Unsernn freuntlichnn grues und alles gutten zuvorann. / Ersamer, besonder gutter freundt. /

Es sein uns II bslagen kasten von demm erbarnn, ernfesten hern Wolff Haller, der durchlauchten, hochgebornn konigin Marien irer majestet hoffmeister, durch euch an Hans Preden geschickt, / zukomenn. Uns ist aber nicht da bey zu geschribenn, / was vor die ist ausgebnn, derwegen wir etlich mol an gemelten hern Wolff Haller geschriebenn / unnd bisher kein antwurt erlangt. / Ist hieummb an euch unser freuntlich synnenn, / wolt uns mit den ersten lossenn wissenn, was die kasten und die wolle darinnenn gekost habnn. / Wan ir solch gelt abzulegen werdet befelenn, / sol mit danckparheit geschenn. / Hieinne lest nicht noch, uns uffs furderlichst zu beantwurten, / do bey ouch nicht wollet unser alten kuntschafft und geselschafft vorgessenn. / Gotlichnn gnaden befolnn.

Datum aus unserm schlosse Heilsberg, den XI Aprilis MD XLV.

Unsernn etc.

Wir haben von Dantzick an euch dies gutte vass Dantzkers birs zuschickenn bostalt, / die man euch auch neben diesem unserm briefe gewiss zufertigenn wirdt, / davon ihr das eine vor euch bohalten werdet / und mit gesuntheit des bires mit den ewren genissenn. / Die andren czwen aber bitten wir freuntlich zuvorschaffen, / das das eine hern Volffen Haller, koninglicher majestet, unser genedigen frawen schatzmeistern, / und das ander nebenn der vormachten packen hernn Cornelio Scepero, Romischer kaiserlicher majestet radt uberantwort werdenn. / Wo wir herwidder dessenthalben euch viel angemmes willens erzeigen kunnen, / thun wir das idere zeit gerne. / Gotlichen genaden mit langweriger gesuntheit beuolenn.

Datum.