Unsernn fruntlichnn grues zuvorann. Ersamer, bsunder, gutter freundt. /

Vorgesternn hab wir ewer schreibnn bey dissem boten entfangen / und dancken euch des fleisse[s] in unsernn sachen gehabt. / Was unser kornn unnd hern Lorencz Ficke belangt, / mogt im sagen, das unser ohm Simon Hannou bynnen III wochenn mit XXX... lasten ungeferlich zu Danczke sein wirt / und lauts des koffs sich gen im haltnn. / Wolt in ouch von unsern wegen fruntlich grussen.

Den wein aus Hispanien an Hans Breden vorschriben, / wie der ouch ist, / wirt Simon uff unser sloss Altenhaus schicken, / im mittlerzceit was fracht oder unkost daruff gangenn, / wolt von unsernn wegen ausrichtenn, / und so her Hans von Werden do von was habenn wil, / loth im folgen etc. So sich ouch, / wie ir vorhofft, / franczossiche wein worden gen Danczk begeben, / wert ir euch noch unsermm vorigen schreibnn wissnn zu haltenn etc.

Unser sigel hette wir gernn mit den erstnn. / Wan das fertig ist, / wolt es mit dissem oder einemm andrenn boten mit den erstnn her schicken. / Simon wir[d] euch das boten lon, / das dissem gegebenn / und noch gegeben werden sol, zcalenn. / Uber das ir dissem habt gebenn, / sein im von uns VI groschenn wordenn.

Simon wirt ewer hausfrau und irer svester, frun... Orteigen, ein klein vorehrung thun. / Wolt sie von unsernn wegen fruntlich grussenn und alle gutte freunde, hiemit wir euch mit den ewren Gote dem almechtigen thun befhelen. /

Datum aus unsermm slosse Lobau, den X... Iulii anno Domini 1534.