Reverendissimo in Christo Patri et Domino, domino Petro dei gratia Cracoviensi et Posnanensi episcopo, regni Polonae vicecancellario, domino meo gratiosissimo

Reverendissime in Christo Pater et Domine, domine gratiosissime, humillimam commendationem.

Inter eundum accepi litteras Dominationis Vestrae Reverendissimae et alias ad Iodocum, quas illi perferam. Andreolus alio itinere nos praeterivit. Nos huc salvi appulimus cum domino collega, praecessi eum, postquam ventum est extra periculum, uno die, et veni huc ipsa Veneris die sancta. Cras hinc rursus equos nostros versus Novam Civitatem praemittemus, secuturi feria quarta in curru Hungarico. Continuimus etiam hic senem illum Charontem, Paulum Bot, si quid se novi offerret post istas, ut per eum scriberemus. Commendo hunc miserum senem Dominationi Vestrae Reverendissimae et rogo: cum semper bene mereri de Dominatione Vestra Reverendissima studuerit, illum suo patrocinio non destituat. Aliud in praesentia scribendum non restat. Commendo me humillime Dominationi Vestrae Reverendissimae, ut domino meo clementissimo et rogo, me et Iodocum sua solita gratia prosequatur.

Datae Viennae, feria secunda Paschae anno Domini MDXXIIII-o