Macz Platen

Unsernn etc.

Wir habnn negst die II {gerdruckte} buch papir mit dem lied erhaltnn, / sein uns ouch mit solcherr grober schrifft / genug zu willenn ausgangen. / In dem ersten geseczt im anfange der vierden zceilenn sein die buchstabnn vorseczt, / volbarcht / vor volbracht etc. Hiemit schicke wir euch das ander, / von dem bekarten sunder, / von uns uffs new mit etlichem zusacz uber sehen. / Wolt das / mit biltnis vorann, / oder wie es euch gefellig, / solch modus, / wie die grobste schrifft hie bey gelegt / und in solcherr weis zusamne gebrocht, / wie die kleinste / lossen druckenn. / Es werden mussen anderhalbs arks papir in idres in II quaternischenn komenn. / Der lost uns hundert drucken / und do vonn zcalenn, was billich, / welchs wir euch mit dem andrenn ausgelegten wollenn zu dancke lossen ausrichten, / ouch mit denn ersten solche hundert exemplaria uns zuschick etc. Hans Holsten hab wir gernn uff Ewer bitt und vonn Ewren wegen gefurdert. / Wirt im weiterr was vonn noten sein, / so weit er recht, / wolle wir ouch im vonn Ewren wegen, / dieweil ir so fleissig euch seiner annemet, / nicht vorlossenn, / wie wol wir uns in disser sachenn wenig freuntschafft machnn, / vil mher fremde vorczornenn etc. Hiemit Gote in sein gnad mit al den Ewren befolnn. Grust Ewer liebe, togentszame hausfrau.

Datum aus unserm sloss Heilsberg, IIII Martii M D XLI.