Dem hochwirdigen fursten und herrn / herrn Johann bischoven zu Ermeland / auff Heylsperg in Preussen, / meinem gnedigen herren/

Cracaw

Hochwirdiger Furst, / Gnediger Herr. /

Ewr Furstlich Gnaden seyen mein underthenig gutwillig dienst zuvor. /

Ewr Furstlich Gnaden schreiben des datum Thorn, den XVIIII Aprillis, hab ich empfangen und daruß Ewr Gnaden begern (was sy ir zutzeitn hundert in zwayhundert dukaten gen Rhom zue machen / benottigt, / das ich sy damit nit lassen, / sonder von alter kuntschafft wegen wilfarn wolte) vernomen. / Daruff fuege ich Ewrn Gnaden underdienstlich zuvernemen, / das ich ewrn Furstlich Gnaden gleichwoll in sollichem und mererm zue dienen gutwillig und genaigt were. / Aber herr Quirin Galler, / der mir ain guete zeit here meine sachen in Rhom verwalten, hat mir verschiner zeit geschrieben, / das er sich von Rhom und heraus in Teutschlande zuthuen willens. / Wie ich dann achte, / er schon uf dem weg sye, / derhalben ich daselbe alle meine sachen uffgehebe, / und wirde hinfuro an zue Rhom nit aigen leut noch gelt mer halten. / Wa aber ewr Furstlich Gnaden etwas bedurffen, / und derselben gelegen sein wurden, / gelt zue Venedig antzenemen, / will ich ewrn Furstlich Gnaden hinfuro an wie biß here gern dienen und söllich gellt Ewr Furstlich Gnaden zue Venedig durch meine leut ußrichten und bezahlen lassen, / wenn sy das verordnen./

So melden Ewr Furstlich Gnaden verrer, sy habe Hansen Preden, meinem diener die ainhundertfunffzig dukaten fur Ewr Furstlich Gnaden oheimen herrn Casparn Hannaw in Rhom bezalt, / wider erlegt, / das ist also guet. / Wolt ich ewr Furstlich Gnaden der ich mich underdienstlich thue bevelhen, / unverhalten nit lassen. /

Datum Augspurg, den XXII tag Maii anno XLIII.

Ewr Furstlich Gnaden unterdeniger Antoni Fugger subscripsit