Hern Kostken allein.

Unsernn etc.

Wir haben aus Ewer Herlichkeit schreiben mit freuden vornommen , / das die ire gelibte tochterr dem edlen, ernfesten Albrechten von Lohendorff zur ehe gebenn hoth, / darzu wir in samptlich von Gote dem almechtigen gnad, / gluk / und heil wunschen zu langen geczeitenn. / Tragen ouch kein zcweifel, das uns Ewer Herlichkeit bey solcher ehefreudt gernn heth gesehenn. / Weil es aber die eil der zceit nicht hoth mugen fuegen, / ist Ewer Herlichkeit bey uns, / und wir bey Ewer Herlichkeit enschuldiget. / Nicht wynigers schicke wir ir, / Ewer Herlichkeit tochterr, / dissen tagen gemess ein kleine vorehrung, / dabey sie lerne das kreucz tragen, / das Ewer Herlichkeit mit irer mutter nicht kan abwerffenn etc. Noch laut der copeien, / wie Ewer Herlichkeit koniglicher majestet geschribenn, / hab wir nichts uns in unsermm schreibnn lossen merken, / weil uns nicht wil geburen / von arendnnn und andren hendlen Ewer Herlichkeit befholenn / etwas anzubrengen. / Was aber die unser privilegien anghet ein vorczog biss uff negst zukunfftige tagfart zu bitten, / hoth uns nicht unbillich bedunckt, uff welcher uns allen, / die das lant mit trewenn menenn / vil wil zu bedenckenn sein, / ouch darzu zuthun so vil umer muglich etc. Es ist ouch gestrigs tags Ewer Herlichkeit diner von der Wilde widerkomenn, / dem wir ein frischen klepper / im hinzcoge mitgegebenn, / sein war im hinkend worden. / Was der uns von iunger koniglicher majestet vor antwurt mitgebrocht, / wirt Ewer Herlichkeit aus beygelegten brive vornemenn, / und was darinnen geschribnn vertraulich halten und uns widerzuschicken. / Der her Vlossek schreibt uns ouch mit grossen erbitten, / dergleichnn koniglicher majestet secretarius, herr Mathias von Macolim, / des briff wir Ewer Herlichkeit ubersendenn, / von wegen der zceitungen uns geschribnn. Wir sein ouch alle stunden unsers botnn von Krako gewertig, der denn fumfften tag des negsten vorschinen monts von uns abgefertiget. / Was der wirt mit sich habenn, / wolle wir Ewer Herlichkeit, / die wir in langwerigerr gesuntheit und wolfart gotlichnn gnaden befelenn, / mit den ersten nicht vorhalten. /

Datum aus unserm sloss Heilsberg, XI Marcii M D XLVI.