Denn ersamen, namhaftigen herrn burgemeystern und rathmanen der konniglichenn steten Elbing und Dantzke, unsern gunstigen freunden.

Unsern freuntlichen grus und alles guts wunschung zuvoran. / Ersame, nhamhafftige hern, gunstige freunde. /

Dyweil sandt Michels thag theglich nahender anghet, / hab wir bedacht uns mit Ewer Erbarkeitschryfftlich zu bereden, / was unser zusamne kommens halben zu thun sey. / Es ÿst leÿder genug offenbar, / mit wass gÿfftiger lufft und anhangenden kranckheÿthen in vÿl örthern / dÿ geswindheÿt der pestilentz uberhandt hat genomen, / und nicht ein kleÿnne zeÿt in dÿsen landen geweret, / derwegenn auch dÿ vergangene thagfart nachgeblÿben. / So wÿl wol vorgesehen sein, wÿ wir uns mit der zukunfftigen sollen halthen, / zu welcher uns / dÿ itzige böse czeÿt und vorgÿfftung, / domit etliche stett und dorffer vorhafft, / nicht ein unbÿlliche schew und forchte geben, / und vÿleicht dar von abtzÿhen / furderlich aus der ursachen, / so wir ein gesunde stelle (: wÿ gesagt wirdt Grawdentz ÿst :) eÿn nhemen, / so mugen dennoch dÿ zufurenden / und dÿ gescheffte und rechts zu warthen haben / nicht abgehalthen werden, / dy welche so vÿl zu flÿhenn sein, / wÿ dÿ stellen, do solche sterblicheÿtt ir wesen treÿbt. /

Wollen auch Ewer Erbarkeit nicht bergen, das in unser herschafft zur Gutstadt das sterben fast anghet, / zu Wornit dergleichen, / und hie beÿ uns in der stadt / etliche am blutgange, / der gemeÿniglich solcher gÿfft vorghet, / noch eÿnander mit thode sein abgangen, / dabeÿ nicht wÿssen, / wÿ es Got weÿther mit uns und den unsern wÿl machen. /

Hierumb wir vors beste finden, / so weÿt es Ewer Erbarkeit gefellig, / das wir samptlich, / ader aber durch uns, koniglicher majestet, unserem allergnedigsten hern, schrÿben / und solche nottliche ursachennn antzeÿgten / bÿttende, ir majestet dÿsen sant Michels thag nach zu lassen / und uns samptlich volkomene macht zu geben / ein andren / mit bekwemeren stelle, / wan dÿse erschreckliche lufft vorgangen, / antzusetzen und zu halthen. / Den bothen, / dem lande und gemeÿnnemm nutz zu gut, / wolle wir gern uff unser unkost an hoff schicken. /

Was hirÿnne Ewre Erbarkeit vor das fueglichste und beste werden ansehen, / wolthen uns mit den ersten ÿre gutduncken wyllen und rath zu schreÿben, / dÿ wir goth in sein gnad befelhen. /

Datum aus unserm sloss Heÿlsberg, den I September M D XXXIX.

Ioannes, von gots gnadenn bÿschoff zu Ermelandt.