Dem Erwirdigenn in Got unnserm besondernn liebem freundt Heren Johansen bischofen zu Colmensehe

Unnser freundtschafft zuuor. /

Erwirdiger in Got, besonder lieber freundt. /

Unns hat der erbar unser heuptman zw Hollandt, rath und lieber getreuer Eck vonn Reppichaw angezeigt, / wie im vorgangenen kriege / etliche pauren, nemlich Andres Lazar im dorff Grabe wonhafft, / Valten Krauszen, sein szon, im dorff Rosztall wonende, / Peter sein bruder, dient zum Rosztall bei dem Kruger, / aussm hollendischen gepiet entwichen, / die alle preussisch und doselbst hin gen Hollandt gehorig syndt / und sich in Eur Lieb dorffer, / wie berurt, / gesaszt haben sollen, / welche egemelter unser heuptman von Eur Lieb aus unserm bevelch yeczt fordernn wurdt. /

Weil aber der konigliche christliche aufgerichte vertrag mit uns clar mitbrengt, / wes in solchem fhall ein iczlich theil sich halten soll, / so ist derwegen euser freuntliche bith, / Eur Lieb wollen obernante pauren mehr gedachtem unserm heuptmann zw Hollandt, / als ehr dan auch dieselbigen anzaigen wurdt, auf sein ersuchen gutwillig volgenn lassenn, / wie wir dan in gleichem fhall / unns zuthun schuldig erkennen / und uff Eur Lieb anregen auch widerumb gernn wilfarenn wollen / und daneben umb Eur Lieb in aller freundtschafft zubeschulden nicht vorgessenn. /

Datum Konigspergk, denn 10 Decembris 1533.

Von Gots gnaden Albrecht marggraf zu Brandenburgk, in Preussen, zw Stettin, Pomern, der Cassuben und Wenden herzog, / burggraf zu Nurmbergk und furst zu Rugen.