APG 300, 53, 269, p. 86

Denn ersamenn unnd namhafftigenn hern burgermeisternn unnd rathmannen der koniglichenn stadt Danntzigk, unnsernn besundern, gutt(en) freunden

APG 300, 53, 269, p. 75

Unnsernn freuntlichenn grus und alles guts zuvoran. Ersame, namhafftige hernn, besundere, gutte freunde. /

Wir habenn unserm vorigenn schreibenn ann E(uer) E(rbarkei)t nach / inn unser cantzley unnd buchernn des dirshawshenn gepiets halbenn lassenn suchenn, / auch also das wir uns selbst der mühe nicht habenn vordriessenn lassenn, / sunder uns auch darob bekummert / und etzliche alte brieve durchsucht. / So ist entlich nichts anders fundenn wordenn, / denn die vier brieve, / derer abschrift wir E(wer) E(rbarkei)t auf ihr itziges schreibenn hierinn vorschlossenn zushickenn, / welche so sie E(wer) E(rbarkei)t inn der sachenn furderlich seinn mochtenn, / hetten wir unser muhe nicht vorgeblich angewant. /

Was die pautzker sache belangt, / mocht wir hertzlich wol leidenn, / das die also vonn ko(nigliche)r m(aieste)t hingelegt wurde, / damit die gutte stadt, unser liebes vatherlandt, / ihres schweren obliegenn, das sie derenthalbenn tregt, / mochte gefreiet werden und wider inn gutte ruhe und vorgehabte gnade ihres hernn komen. / Euch inn der unnd andrem vil wolgefallens zuertzeigenn sein wir allezeit gneigt. / Gotlichen gnaden bevolh(en).

Dat(um) aus unserm schloss Heilspergk, denn XXIII Februarii M D XLV.

Joannes, vonn Gots gnadenn bisschoff tzw Ermelanndt