Denn ersamenn unnd namhafftigen herrenn burgermeistern unnd rathmannenn der koniglichenn stadt Dantzig, / unsernn besunderen, gutten freunden

Unnserenn freuntlichenn grus unnd alles gutts zuvoran. / {Ersamer}, namhafftige herren, besundere, gutte freunde. /

Der freuntlichen zuvorsicht halben, / die wir zu Ewer Erbarkeit tragen, / mugen wir nicht ablassenn, / weil wir etlich mhal vor unnsern armenn schwager Heinrich Hoffman gebethenn, / abermhals unnser bitten vor ihn ann Ewer Erbarkeit zu stellenn, / nemlich in deme, / so diese zeit der beum auf der Radaun bey den fischeren loss ist, / das ihn Ewer Erbarkeit damit uns zu wolgefallenn wolten vorsehenn, / welchs wir umb dieselbte Ewer Erbarkeit unnd die gutte stadt, unser vatherlandt, / mit aller wolthat zu jeder zeit zubeschuldenn / uns erbietten. / Gotlichen gnaden bevolhen.

Datum aus unserm schlos Heilsberg, den VIII Aprilis M D XLVI.

Joannes, vonn Gottes gnadenn bisschoff zw Ermelanndt /