Reverendissimo in Christo Patri et Domino, domino Ioanni Dei gratia episcopo Varmiensi, domino fratri et maiori plurimum observando

Reverendissime in Christo Pater et Domine, domine frater et maior plurimum observande. Salutem et studiorum meorum commendationem.

Litteris Reverendissimae Dominationis Vestrae proximis ad magnificum dominum palatin[um] Pomeraniae datis, ne quid illum ceterosque dominos moraretur, meas quoque addidi littera[s] sententiam meam explicantes, quae qualis sit, ex adiuncta praesentibus copia Reverendissima Dominatio Vestra accipiet. Versamur certe inter saxum et sacrum. Sed levabit nos ipsa impossibilitas et facultatis inopia nec visum est nos decere, ut petamus alienae causae dilationem, qua[m], ut reor, ne ipsi quidem, quorum interest, petere audebunt, nec si peterent, impetrabunt. Est praeterea actionis natura talis, ut dubitem, an nobis ecclesiasticis liceat iudicio illo interfuturis potestatem nostram dare, nedum ipsi interesse. Videbatur igitur negotio hoc nostro accommodatius, ut ea modo sub generalitate peterentur, quibus privilegiorum nostror[um] servetur integritas. Reverendissima Dominatio Vestra non meum iudicium, quod fallere potest, sed ceterorum co[n]sentientia vota sequetur. Ea, quae ad me dabuntur, evestigio mittam. Optime valeat Reverendissima Dominatio Vestra meque benevolentia sua ut prosequatur, opto.

Datae Lubaviae, die 6 Februarii 15[45].

Reverendissimae Dominationis Vestrae studiosus et obsequens Tidemannus episcopus Culmensis