GStA PK, HBA, C1 No 790, 3 unnumbered

Dem durchlauchten, hochgebornen fursten und herren, hern Albrechten, von Gots gnaden marggraff zu Brandenburg, in Preussen, zu Stetin, / Pomern, der Cassuben unnd Wenden hertzog, burggraff zu Normbergk und furst zu Rugen, / unserm hochgunstig(en), lieben hern und freunde

GStA PK, HBA, C1 No 790, 1 unnumbered

Durchlauchter, hochgeborner furst, / hochgunstiger, lieber herre und freundt. / Unsere freuntliche und vleiswillige dinste zuvoran. /

Uns ist gestrigs tags E(wer) F(urstlichen) D(urchlauch)t schreiben, den andern tag dits monts zu Konigsberg ausgangen, / mit des reichs abschiedt, / und was sonst in E(wer) F(urstlichen) D(urchlauch)t brieffe vorschlossen, / zukommen. / Thun uns derhalben gen E(wer) F(urstliche) D(urchlauch)t uff das vleissigst bedancken, / und wollen widderumb alles das jenige, das des orts von solchen und andern hendeln an uns gebracht wirt, / E(wer) F(urstlichen) D(urchlauch)t nicht vorhaltenn, / doneben auch alle unser vormuglicheit dorzu thun, das wir zu ehren und nutz E(wer) F(urstlichen) D(urchlauch)t fueglich und dinlich erkennen, / wie wir dan alwege gethan / und vordan wirglich zuerzeigen uns erbiethen, / nemlich in dem, das wir bei koniglicher m(aieste)t, unserm aller gnedigisten herren, Euer F(urstlichen) D(urchlauch)t sachen, / die uns hie im lande, / auch in der Cron alle samptlich mit anruren, / zu gut und furdernus werden mugen vortstellen. / Des bitten wir E(wer) F(urstliche) D(urchlauch)t sich gentzlich zu uns wolde vorsehen, / und so die was bei ko(nigliche)r m(aieste)t und andern hoen stenden, / do wir bekant, / so vil von uns muglich / GStA PK, HBA, C1 No 790, 1 unnumbered wil ausgericht haben, / wolde uns E(wer) F(urstliche) D(urchlauch)t solchs lassen wissen. / An unserm gutwilligen und dinstlichem gemuet, / das wir zu E(wer) F(urstlichen) D(urchlauch)t tragen, / sol uns, / so weit unser schlecht und geringer vorstandt reicht, / nichts abgehen, / worinne wir ymer nutzlich / und uns E(wer) F(urstlichen) D(urchlauch)t wilferig, / so vil an uns ist, / mugen sein, / und solchs mit der that beweisen, / dan uns E(wer) F(urstliche) D(urchlauch)t in allem zuvorhalten / und freuntlich zudienen / sein wir gentzlich gevlissen, / welchs wir zu danckbarm antwort E(wer) F(urstlichen) D(urchlauch)t uff derselben freuntlich und vortraulich schreiben / nicht haben wollen / gantz zugethaner weis / unangezeigt lassen. /

Dat(um) Heylsberg, den funften Septembris M D XLI. /

Ioannes von Gots gnaden bischoff zu Ermelandt

qui sup(ra) ma(n)u p(ro)pria s(ub)s(cripsi)t