BCz, 1601, p. 266

Reverendo in Christo Patri, domino Ioanni episcopo Culmensi sincere nobis dilecto

BCz, 1601, p. 265

Sigismundus Dei gratia rex Poloniae, magnus dux Lithuaniae, Russiae, Prussiae, Masoviae etc. dominus et heres

Reverende in Christo Pater sincere nobis dilecte.

Putamus non latere Vestram Paternitatem, quod in praeterito generali conventu regni nostri certis rationibus adducti decreveramus cum consiliariis nostris ab indicendo in proximum hunc sequentem annum conventu abstinere contributioneque pecuniaria, quae anteactis annis in publicum defendendi regni onus imponebatur, intermissa, veterem defensionis modum capessere et expeditionem bellicam communibus domesticis viribus sustinere. Quod institutum nostrum cum nunc ex rerum permutatione intra id tempus facta consideremus reipublicae regni nostri non conducere, quae aliis nunc consiliis egere videtur, quam quae nobis praeterito tempore placuerant, in meliorem illud partem vertendum duximus. Etenim praeter id, quod cum voyevoda Valachiae et Thartaris nullum foedus habeamus illorumque contra dolos et hostilitatem assidue experiamur, non parum nos terret hoc tempore et in metum adducit, quod divina humanaque misceri ubivis gentium audiamus. Huc accedit, quod veremur, ne Thurcorum imperator ex depopulatis recens Christianis provinciis tumore sublatus et insolentior factus, nobis inter ceteros negotium aliquod facessere et hostilia inferre contendat. Quare cum ad providendum his impendentibus periculis et statum totius regni nostri in tuto collocandis, commune omnium consilium summe et mature nobis necessarium videretur conventum regni generalem in oppido nostro Piotrkow ad diem sanctorum Trium Regum proximum indiximus. Quoniam vero ex his periculis supra scriptis magna pars rempublicam terrarum istarum Prussiae spectare videtur, ad communem consultationem conventum quoque istis ipsis terris in oppido Graudnicz pro die Circumcisionis Domini proximo indicendum duximus et indicimus hortamurque Vestram Paternitatem, ut ad eundem conventum Graudnicensem prius proficiscatur, deinde habita illic super his, quae per nuntium nostrum proponentur, mutua consultatione, ad conventum regni generalem praedictum Piotrcoviam veniat et non aliter faciat pro officio suo et gratia nostra.

Bene valeat Vestra Paternitas.

Dat(ae) or Dat(um)⌈Dat(ae)Dat(ae) or Dat(um)⌉ Cracoviae, feria quarta post festum sancti Martini anno Domini M-o D-o XXXII, regni nostri anno XXVI-to.

Commissio propria regiae maiestatis