Denn erwirdigenn in Goth unnsernn besunder... liebenn freundenn unnd nachbarnn herrn[n] Johanssen unnd herrnn Tydemanno bischoff[en] zu Ermelandt unnd Colmensehe sempt[lichen] unnd sundernn

Unnser freuntlich dinnst unnd was wir liebs unnd guts vormogenn zuvornn.

Erwirdige in Goth, / besonndere liebe freundt und nachtbare.

Wir habenn aus Euer Lieb semptlichenn schreibenn, / des datis Elbingenn am drittenn tag Martii gegenwertigs jars, / die behinderliche ehafftige noth, / warumb das meÿste teÿl koniglichs orts Preussenn stende unnd rethe zu diesem angesetztenn lanttagk genn Elbingenn nicht kommenn. / Warauf Euer Lieb unnser schriefftenn, / so vonn uns ann berurte stende belangende die gemeynenn dieser lande gebrechenn und obliegendt inn einfuhrung allerley gelegenhait gestelt unerprochenn gelassenn, / mit angehefftenn freuntlichem erpietenn, / sampt fernner seines inhalts / vorstandenn etc. Nun habenn wir angetzeigte vorhindernus, wardurch solche zusammenkunfft der loblichen rethen unnd stendenn koniglichs theils Preussenn, gemeinen diesen landenn unnd andern hendelnn zum bestenn / nachpliebenn vast ungernn gehe....

Dieweill es aber der liebe Got also unn... dermassenn geschickt mus es demselb[en] pis in bequemer zeit unnd seiner gue[then] vorfuegung bevolhenn sein. / Allaint wir thun unns gegenn Euer Lieb des freuntlichenn nachtbarlichenn erpietlichenn willenns hochlichenn bedanckenn inn wolthetiger freuntschafft hinwidder zuvordienenn, / unnd hettenn unnsers erachtens Euer Lieb als die vornembsten haupter unnd glieder berurter konigli[ch] Preussischer rethe / solchenn brieff ahn gefahr oder einig hinderdenckenn erbrech[en] auch sollichs leichtlich gegenn denn andern stendenn vorantworthenn mogenn, / wer... es auch fur unnser personn / woll zufriden gewesenn, / damit unns Euer Lieb diesem arm[en] vaterlandt zum bestenn ir gutbedunckenn wie allenn gebrechenn, / und sunderlichen der herein tringendenn erschrecklichenn tewrungenn / alsviel moglich zceitliche vorkommung bescheenn mocht, / umb sovill nutzlicher unnd stadtlicher freuntlichenn mitheÿlenn hettenn konnenn. /

Nachdem es denn aus angeregtenn ursachenn also entstandenn unnd vonn Euer Lieb denn brief ungeoffent bleibenn zulassenn fur gut angesehenn wordenn, / ist unns dasselbig auch mit unnd nicht entgegenn allaint. /

Wiewoll zu unserm ann Euer Lieb schreibenn, vast die notwendigstenn puncten inn denn schrifften gegen denn koniglichenn stendenn auss gedruckt, / so ist es dannocht etwas weitleufftiger in söllichem angetzogenn. / Hirumb wöllenn wir nochmals inn Euer Lieb vilbemeltenn briff zuerbrechen, / und uns ir getrewhertzigs wolmeynend bedencken darauf zuerkennen zugebenn, / oder aber pis auf nechste zusammennkunfft beruehen zulassenn, / wolgefallen gestelt haben. Unnd woltenn Euer Lieb (der wir zu freuntlicher nachbarschafft und allem guten gneigt) sollichs auf ir schreibenn in antwort hinwidder im bestenn nicht bergenn. /

Datum Konigsberg, den 7-ten Martii anno etc. im 40-ten.

Von Gots gnaden Albrecht marggraf zw Brandenburgk, in Preussen, zu Stettin, Pommern, der Cassuben und Wenden hertzog, burggraff in Nurmbergk und furst zu Rugen manu propria subscripsit