BCz, 1606, p. 594

Dem Erwirdigenn in Got unserm besondern lieben Freunt und Nachparrn, hern Johansen bischoffenn zu Ermlant, desgleichen den wirdigen achtbarn und hochgelerthen unsern lieben besondern probsten, dechant und ganczem capithel zur Frauenburg

Semptlich unnd sonnderlich

BCz, 1606, p. 593

Vonn Gots gnadenn Albrecht marggrave zu Brandenburgk, in Preussen zu Stettin, Pommern, der Cassuben und Wenden hertzogk, burggrave zu Nurmbergk und furst zu Rugenn

Unnsere freuntliche dinst gunstigenn grus unnd gnedigenn willenn zuvorn.

Erwirdiger in Got, / besonder lieber Freundt / und Achtbarre Hochgelarthe besondere Liebe.

Wir habenn E(uer) L(ieb) unnd ewer schreibenn semptlichen, / an und ausgangen, / bekhommen und daraus / aus was ursachenn E(uer) L(ieb) und euch, / der mulpaw welchen der erenvhest / unnser obermarschalch, rathe unnd lieber getrewer Friderich von der Olsnicz / an der Passarien aufgericht / nicht leidlich vorstanden, / derwegenn E(uer) L(ieb) unnd yr dennselbenn abtzuschaffenn begeren thut. / Nun haben wir vor diser zeit / ahn E(uer) L(ieb) und euch schreibenn lassenn, / wo es ihe nicht anders sein wolt, / das wir solchen / so weit ehr sich auf derselben grundt und padem erstrecken thet, / abtzuthun vorschaffen wolthenn, / wie wir dan auch solchs bemelchem unnserm marschalchen / algereidt bevolhen, / vorhofflich weil E(uer) L(ieb) vormals / die zeit zu abschaffung desselben bis zu Michaelis selbst erstreckt, / E(uer) L(ieb) und ir damit zufriden sein werden. / Dis haben wir E(uer) L(ieb) und euch freuntlicher gnediger maynung nicht vorhaltenn wollenn.

Dat(um) Konigspergk, denn 25 Iunii anno 1541.

Vonn Gots gnaden Albrecht, marggrave zu Brandenburgk, in Preussen, zu Stettin, Pommern, der Cassuben und Wenden hertzogk, burggraff zu Nurmbergk und furst zu Rugen