Dem Erwirdigen in Gott, / unserm besondern lieben freundt, / herren Johansen bischoffen zu Colmensehe etc.

Erwirdiger in Got, fielgeliebter Her freunt und nachpar.

Nach erpytung meiner gantz freuntlichen dinst wunsche ich Euer Lieb von Got dem hern fiel gesuntheit der selen und leibs hogste wolfart und alle seligkeit.

Wil auch Euer Lieb in geheimb nicht pergen, das ich durch gotliche verleihung mich mit meinem jungen vettern und brudern marggraff Ioachim dem Iungern auff Omnium Sanctorum bedaget. Verhoff zu Got dem hern in der sach Euer Lieb bewust etwas fruchtpars auszurichten, den nur dy sachen nit weitgeschlagen wurt, sunder fast gewilligt meinem rat zuvolgen, wy ich auch Koniglicher Maiestett dy briff bereit zugeschickt.

Newe zeitung als fiel auch so gut pos und wars / sein, wurt Euer Lieb von irem swager vernemen. Uberschik mein maler widerumb mit etzlichen gemele; bedunk mich des freuntlichen erzeigten willens so meinem maler und in dem mir bewisen, verdine schuldig willig gern.

Befele Euer Lieb und uns al dem schutz des aller hogsten und uberschick Euer Lieb einen spruch von Euer Lieb und meinem trewen diner Nickel Nibschitzen lauts seinem befelih.

Datis in eile mit egner hant, Kungspurgk, den 4 Septembris anno 1534.

Albrecht margraff und hertzog etc.