AAWO, AB, D. 91, f. 1 unnumbered after 222

Dem hochwirdigen fursten unnd herren, herren Johann, bischove / zu Culmen und administrator zu Pomesan etc. meinem genedigen herrn

AAWO, AB, D. 91, f. 215r

Hochwirdiger furst, genediger herr. Eurn furstlichn Gnaden sein mein unnderthanig, willig diennst zuvor. / Genediger herr. /

Ungevarlich im monat Julio / jungstverschinen, / alls ich auß Spanien komen, / hab E(wer) F(urstlichen) G(nade)n ich / der muetter / und tochter in Spanien halber geschriben / und dar inn angetzaigt, / wie die muetter nit gesÿnet järlichen ain genant gelt zunemen, / auch wie ir begern seÿ, / innhalt ains briefs von ir, / so E(wer) F(urstlichen) G(nade)n ich datzumal hab zuegesannt, / das ir ÿetzt also bar zwaÿhundert ducaten gegeben werdt. / Damit wolt sÿ ain pfruendt kauffen, / davon sÿ ir lebennlang ir gewisse narung hab / unnd also fur alles benuegig / unnd zufriden sein, / E(wer) F(urstlichen) G(nade)n weitters nicht mer derhalben anfordern unnd on das die tochter nicht von ir lassenn, / sÿ seÿ dann diser zwaÿhundert ducaten zuvor enntricht. / Auf solh mein antzaigt schreiben / hab ich bisher / kain anntwurt empfanngen, / unnd demnach ich mit Gottes hilff inner VI wochen nach dattum diß briefs in Hispanien zuraisen willenns bin, / hab ich solhs E(wer) F(urstlichen) G(nade)n zu unnderthanigem gefallen zuvor antzaigen wellen, / damit ob E(wer) F(urstlichen) G(nade)n ich / in dem oder annderm in Hisp(anien) bediennen kundt, / darzue ich dann ÿetzt unnd allweg(en) willig erfonnden werden wil etc. / AAWO, AB, D. 91, f. 215v Hierauf E(wer) F(urstlichen) G(nade)n nach derselben gelegenhait / mir wol darauf zushreiben / unnd zubevelhen wissen, / denen ich mich hiemit unnd allezeit unnderthanigklichen bevelhen thue. /

Dattum Augspurg, den XVIId(en) tag Decembris anno etc. im XXXIIIIt(en).

E(wer) F(urstliche)n G(nade)n

unnderthanig

Her(onimus) Sailer