Unsern fruntlichn grues mit aller seligheit wunschung zuvoran. / Edler, wolgeborner her, gunstiger freundt.
Wie Ewer Herlichkeit negst den ⌊pfarrer⌋ und etliche ⌊leute⌋ vom ⌊Newenmarckte⌋ an uns geschickt, / welche in eides stat, wie recht ist, bekant habn, was vorstorbnerr her ⌊Witwinski⌋, ploczker castellan von der pfarkirch, und der capellon vor der stat weggefurt. / Dar uff sende wir Ewer Herlichkeit mit dem bekantnis, diss arrest / wold von der kirchen und ⌊koniglicher majestet⌋ wegen darzuthun, / domit das jenige wider zur stelle mochte komen, / das der gestalt entfrembd in die ⌊Masaw⌋ aus koniglichnn gutternn gefurt ist, / und sich noch laut des arrest haltenn. Ouch ist unser fruntlich bitt, Ewer Herlichkeit wolde die, welche uns noch unser pflug getreide schuldig, / darzu aus koniglicher auctoritet Ewer Herlichkeit vorlegen, / czwingen und bringen, / das sie an weiter seumen oder vorczug gen ⌊Strosburg⌋ in die pfarre, was sie uns pflichtig / theten furen und ablegen. Ire nhamen wirt der ⌊pfarrer⌋ Ewer Herlichkeit anczeigen. Das wir umb Ewer Herlichkeit, / die wir Gote in langweriger gesuntheit thun befelen, / alweg gern fruntlich wollen beschulden. /
