Dem hochwirdigenn in Godt Fürstenn unnd Herrenn, herrenn Ioanni, von Gottis gnadenn bysschove der loblichen kirchenn Ermelanndt etc., unnsrem gnedigenn herrenn

Hochwirdiger in Godt Furst, Gnediger Herre.

Unnsre willige stete unnd unverdrossenn diennste seint Ewer Hochwirdigen Gnaden gantz unngesparetts unnd dinstlichs wleisses zuvoran bereÿt unnd wilferttig entpfolenn der gnedigenn unnd besten wolgeneigttenn forderungsschrifften. /

Gnediger Herre. /

Yn unnserenn jungsten an die kunigliche mayestät ubliggenndenn gewerbenn vortgestelligten unns gnediglich widderfarenn unnd verlihenn seint, wie mit schuldiger unnd geburlicher dancksagunge eindechttig unnd danckbar unnd nach deme dieselbttigenn allenthalbenn nicht tzw endtlicher örtterunge bysher awsgangenn seint, wir aus besonder getrewlichenn tzuversicht, worauff die tzum theile bestandenn unnd verbliebenn, Ewer Gnaden erster beqwemikeit tzw entdeckenn nicht unbedacht, wie dem allem gnediger herre.

Nachdeme die gewonliche tzeit der tagssamlunge uff Michaelis in dissenn landenn zcw haldenn ubelich fast nahent herankumpt, bittenn wir Ewer Hochwirdigen Gnaden, wes wir unns disser zceit bemeltter tagsleistunge halbenn gewislich vermuttenn sollen, unnd ob die wirt gehalttenn werden, adir nicht, gnediglich mit schryfftlichem antwurt bey gegenwerttigem unsrem bottenn zcu verstendigenn wolle geruchenn.

Dornach wir unns eygentlich tzw entrichttenn Ewren Hochwirdigen Gnadenn (deme almechttigenn yn gluckzeligem regimenten und leyblicher wolfart zcw langenn tagen zelig bevolen) wir dinstlich zcu willfarenn alletzeit willig unnd unverdrossenn.

Geben eylendts aws dem Elbing, montags nach Matthei apostoli et evangelistae anno etc. XXXVIII-ten.

Ewer Hochwirdigen Gnaden bereit unnd gantz dienstwillige burgermeister und radtmanne der kuniglichen stadt Elbing