» CORPUS of Ioannes Dantiscus' Texts & Correspondence
Copyright © Laboratory for Source Editing and Digital Humanities AL UW

All Rights Reserved. No part of this publication may be reproduced or transmitted in any form or by any means, electronic or mechanical, including photocopy, recording or any other information storage and retrieval system, without prior permission in writing from the publisher.

Letter #2202

Tiedemann GIESE to Ioannes DANTISCUS
Löbau (Lubawa), 1539-07-26
            received [1539]-07-31

Manuscript sources:
1fair copy in Latin, autograph, BCz, 1597, p. 757-762

 

Text & apparatus & commentaryPlain textText & commentaryText & apparatus

 

BCz, 1597, p. 762

Reverendissimo in Christo Patri et Domino, domino Ioanni Dei gratia episcopo Varmiensi, fratri et maiori plurimum observando

BCz, 1597, p. 757

Reverendissime in Christo Pater et Domine, frater et maior plurimum observande. Salutem et studiosam mei commendationem.

Ego apud illustrissimum dominum ducem, quod ad institutas nuptias venturus non sum, usus sum excusatione reliquiarum aegritudinis meae, quae me in schola medicorum etiamnum retineant praecipientium mihi, ut apertam auram vitem, quantum possibile est. Reverendissima Dominatio Vestra, quid praetexti afferre possit, non assequor, nec facile est divinare ignoranti, quae ad hanc rem pertinent. Habet Reverendissima Dominatio Vestra apparatum satis honestum ad hanc profectionem. Refert fortasse etiam non parum, ut semel conveniat, vicinum cupidum congressus mutui, praesertim cum ea res nuper fefellit exspectationem eius in baptismo, nescio ubi celebrato, quod ut audio, male habuit eum. Ideo nisi aliud sit, quod dehortetur, ausim suadere, ne detrectet Reverendissima Dominatio Vestra hanc profectionem, habitura illic, ut conicio, ex nostris multos comites et assistentes. Id tamen relinquo meliori iudicio Reverendissimae Dominationis Vestrae, quae si aversabitur hanc provinciam, rogo, consulat, an saltem nuntii mittendi a nobis sint aut munera, quod etiam profecta Reverendissima Dominatione Vestra mihi fortasse me decebit. In quo cupio doceri a Reverendissima Dominatione Vestra, quae rogo boni consulat hanc meam brevem festinantis scriptionem.

Et optime felicissimeque valeat.

Lubaviae, die 26 Iulii 1539.

Eiusdem Reverendissimae Dominationis Vestrae obsequentissimus Tidemannus episcopus Culmensis

Postscript:

BCz, 1597, p. 759

Reverendissime Domine.

Posset fortasse non inepte Reverendissima Dominatio Vestra hoc praetextu uti, quod cum fere in convicinio saeviat pestis, ut etiam a servitoribus suis ultro citroque obversantibus ipsa temperare cogatur, non libente velle hominibus delicatioribus horroris occasionem praestare iudicantibus non esse hoc tempore tutum multorum congressum.