Dem Hochwirdigen Fursten und Herren, / hern Johann bischoven zu Ermelant etc., meinem gnedigen herrn /

Auf Hegelsperg in Preussen

Craca

Hochwirdiger Furst, / gnediger her. /

Euren Furstlichen Gnaden seind mein underthenig willig dienst zuvoran beraitt. /

Eurer Furstlich Gnaden schreiben mir yetzo gethan, / hab ich sambt zwayen briefen, / der ain an meinen gnedigen herren marggraf Johann Albrechten, / und der ander an herren Cornelium Scepperum, / kayserlicher majestät rat lauttende, / empfangen, / die will ich an ire gehorige ort schickhen / und, so antwurt darauf gefellt, / meinen diener Jorgen Hegel gen Craca schickhen./

Das wiltnus ol so Eur Furstlich Gnaden bemelten Jorgen Hegel / mir zu schickhen / zuegestellt, / nemb ich also von Euren Furstlich Gnaden zu underthenigem danckh an. / Warinn ich dann Euren Furstlich Gnaden auch underthenig dienst ertzaigen kan, / das bin ich zethuen beraitt. /

Thue mich hiemit Euren Furstlich Gnaden underthenigklich bevelchen./

Datum Augspurg, am dreyzehenden tag Aprilis anno etc. im viertzigisten.

Euer Furstlich Gnaden unterdeniger Antoni Fugger subscripsit