Sigismundus Augustus Dei gratia rex Poloniae, magnus dux Lithuaniae, Russiae, Prussiae, Masoviae etc. dominus et heres.

Reverendissimo in Christo Patri, domino Ioanni episcopo Varmiensi et Magnifico Stanislao Kostka palatino Pomeraniae, terrarum nostarum Prussiae thesaurario, sincere nobis dilectis gratiam nostram.

Reverendissime et Magnifice, sincere nobis dilecti.

Postquam sacra regia maiestas, dominus et parens noster colendissimus, pro suo in nos paterno amore potestatem nobis facere dignatus est omnia bona mensae suae et nostrae in Prussia obligata redimendi commodisque nostris applicandi, nos pro eo desiderio, quo tenemur, ut auspiciis nostris bonae litterae incrementum accipiant in diesque magis augeantur, permisimus, ut duae villae Frankenhain seu Gruta et Starkenberk cum molendino de manibus generosi Stanislai Varschimowski et eius uxoris possessorum seu tenutariorum Rogoznensium in Prussia per reverendum dominum Tidemannum episcopum Culmensem redimantur et commodis seu usibus scholae litterariae Culmensis applicentur. Itaque committimus Strenuitatibus Vestris volentes, ut vocatis ad vestri praesentiam generosis Stanislao Varschimowski et eius uxore iura, privilegia, obligationes, quas se ad ipsas duas villas et molendinum habere praetendunt, coram vobis reponi et summam pecuniae iuste et legitime inscriptam a reverendo domino episcopo Culmensi recipere faciatis, in cuius quidem domini episcopi possessionem et administrationem praedictas duas villas cum molendino tradatis, facientes, quicquid decreveritis, a partibus firmiter observari, secus non facturi.

Datae Vilnae, die septima mensis Novembris anno Domini M-o D-o XLVI-o millesimo quingentesimo quadragesimo sexto.

Commissio sacrae maiestatis regiae propria