Gabriel Tarla

Unsernn freuntlichen grus mit aller wolfart wunschung zuvorann. Edler ernvhester her bosunder gutter freundt.

Ewer Herlichkeit freuntlichs erbittenn / das die vnboswer[t] gerne die jenigen so wir an Ewer Herlichkeit vorschriben worden / bei koninglicher majestet ein furderen wil / ist uns fast angenem gewesen aus demsulben schreibenn zuerfharenn / bodancken uns auch kegen Ewer Herlichkeit der freuntlich[en] zunigung / wo wir herwidder ihr bestes werden wissen vn[d] die furderen kunnen sol nichts an unserm gutten willen abgeh[en] . Dieweil den Ewer Herlichkeit neben uns der arm[en] frawen und ihrer sachen halben / die wir an neheren m[al] Ewer Herlichkeit bei koningilcher majestet zufurdern gebeten / billichs mitleidenn tregt / und gedochte sache von koninglicher majestet bass auf negsten reichstag ferner zuuorhen... und entlichen abscheidt zug[e]benn / vorleget werdenn. Bitten wir abermal freuntlich / Ewer Herlichkeit wolte angezeigter frawen und ihrem procuratori Marten Bande / der alda die sache vortstellen wirdt / mit ihrem gut[en] radt und furderung bei koninglicher majestet und den anderen hern / nicht sthenn / sunder vorhelfe das die arme frawe von vnbillichenn bodrengnus das ihr zugefuget / gefreiet / widderum zu dem ihren und gutter ruhe komme muge. Das vorschulde wir widderumb Ewer Herlichkeit / die wir gotlichen genaden m[it] langweriger gesuntheit bovelen / mit allem zugethanem vn[d] genigtem willen und bitten wo etzwas von zeitungen bei dersulben weren uns solche nicht zuvorhalten.

Datum aus unserm schloss Heilsberg den letzsten Iulii M D XLVIII