Meinem bruder Bernt

Unsernn etc.

Aus deinem schreibnn hab wir gern vornommenn das jenig[e] deines gebeuds und ander dinge halbenn / angeczeigt. / Sein ouch sond[er]lich erfrewt, das unser vil gelibterr svager, der her burgraff ... teglich an seiner gesuntheit besserung entfindt, / die wir im volkomenn von Gote de[m] almechtigen wunschen und bitten. / Du wirst innn widerummb uff ... freuntlich / durch dein schreiben / zuentbitten, / von unsernn wegen freunt[lich] grussen und im sagen, / das dis mhal nichts bey uns ist ... zceitungen / oder andremm, das wir zu schreibenn notig achtenn. / Wir hab ... botnn aus, / wie du weist, / Papusken und Moriczen. / Der erst ist den..., der ander den XXIX Iulii ausgeritten, / der wir einenn uns alle ... vormuttenn. / Was uns wirt zukomenn, / sol unvorhalten bleibnn .... Wie du schreibst, das der her burgraff sich zcwir zu rathausse hot lossnn tragen, / ist uns lieb. / Vil lieber wirts uns sein, wan er in gutter gesuntheit selbst wirt uff ghen, ouch wie du tust melden, das du noch ein zceit lang vorczyhen wilt, / k... wir in deinemm willenn. / Schreib dennoch von allem, das sich al...halben zutregt. Gotlichnn gnaden befolenn.

Datum aus unserm schlosse Heilsberg, XXII Augusti MD XLV.

Vom dem gnedigen hern wirstu uns schreibnn, / wie die gemein do n... zu fried ist, / das er selden in der stat sich finden lest, / ouch sonst das du erfaren kanst, das er vor hoth. / Von dem marschalampt wirstu dem etc. sagen, / so wir es nicht zuvor vors... hetten, / were er uns gros genug darzu etc. Hab vleis umb gu... oliven, / capren, / und lemonien etc. In der lismanschn sache wirstu ... sagen, / das der von Stum die citacion wider sie nicht hot wol... sigeln, / gebeten, / das die commission und ladung uff die tagfart gen Graudencz wurd vorlegt, / welchs ich an hoff geschriebenn. Er hoth uns ouch angeczeigt, das er gesint ist, die s... zuvortragen etc. Was hirinne A wirt wissenn, / wirst bitten nicht zuvorhalten etc. Wir lossen die new gulden kreucz ..., darzu bedurffen wir XII perlen, / ein klein wenig grosser alse d[ie] im zcedelschnn gelegen. / Do bey hab fleis, das wir die mit de... mugen habnn etc.