Dem Hochwirdigenn inn Gott Herrn, Herrn Johanni vonn Gottis genadenn / des loblichenn stichts zu Ermelanndtt bisschoffenn etc. unserm Genedigen Herrn. /

Hochwirdigster inn Gott, Genediger Herr. /

Unsere bereitwillige dienste seint Ewer Hochwirdige Gnaden allewegen zuvornn bereith. /

Genediger Herr. /

Ewer Hochwirdigen Gnaden schrifte darinne von der vorschreÿbung der erbenn unnd lygendenn grunden / in dieser unser stadt gelegenn / vonn gotseligem Ewer Hochwirdigen Gnaden vater herkommende / irer genadenn brudern unnd geswisternn zcugelehstenn bogeret. /

Donebenn auch von der genedigenn furderung und angewandtem fleis, / zo sie in den jenigen bewusten sachen davon am jungstenn unser geschicken beÿ Ewer Hochwirdigen Gnaden beworben / zcum bestenn gethaenn vormeldet / mit genediger vortrostunge das zculangen / darann wir einenn gefallenn tragenn sullen etc. wie dan solchs breiter in denselben schriften enthalten / haben wir entphangen / unnd fornern inhalts woll eingenommen. / Unnd geben darauff derselbigen Ewer Hochwirdige Gnaden dinstlich zur antwurt wissen, / das die vorschreibunge der erben schon im theyle in beywesenn Ewer Hochwirdige Gnaden bruders her Bernts unnd Jurgen Hannowenn(!) / follentzogenn, was aber noch restende ist / unnd an unns nachmals gesucht wur soll auch an unns keinenn mangell haben, / aber zo viell das schreibenn unnd genedige furderung. / Zo Ewer Hochwirdige Gnaden in gedochtem unserm obligenn unns unnd denn unsernn zum bestenn an konniglichen hoff gethoen / belanget / thun wir unns des gaer hochlich und dinstlich bedanckenn. /

Solchs auch unsers gutten dinstlichen fleisses / unnd beheglicher wylfahrunge herwidderumb zcuvordienen stets unvordrossenn befundenn werdenn / unnd wollen des vorheften gutten bescheids etc. Ewer Hochwirdige Gnade herwidderummb inn antwurt erhaltenn wirt irem genedigen erbiettenn nach erwartenn / und thun Ewer Hochwirdige Gnade gute lange gesunt und seliglich befhelen.

Datum Danntzigk, den 22 / Septembris. /

Ewer Hochwirdige Gnade dienstwillige borgermeister unnd rathmanne der stadt Danntzigk