Den ersamen, nhamhafftigen hern burgemeyster und rathmanne der koniglichen stadt Dantzke, / unsern gunstigen freundenn.

Unsern freuntlichen grus mit alles guthen zuvoran. / Ersame, nhamhafftige hern, gunstige freunde. /

Wy wir Ewer Erbarkeit negst geschryben / von der byt an konigliche majestet, unseren allergnedigsten hern, / von wegen unser thagfarth vorlegung gesteldt, / sein uns dysen thag von ir majestet durch dysen kemerer schryffte zcu komen, / in welchen stelle und zceytt / noch gewonthem brauch zu Marienburg wirdt gesetzt. / Dyweyl dan Ewer Erbarkeit gedachter stadt nehenther sein, / woldt uns borichten, wy dy lufft do geschickt yst. / So sich der nicht wer zu besorgen, / mochte wir wol leyden, / daß unser zusamne komung uff {sandt} Stanislaii do gehalthen wurd. / Wan aber solchs mit der gesuntheyt ferlicheit nicht mocht geschen, / wolthe wir uff unser negst schreyben, / durch unsern bothen an konigliche majestet geschickt, / antwurt wartthen. / Was hirynne zu thun wer, / woldt euch mit den hern woyewoden und kastellan, im negsten auch mit den ersamen von Elbing underreden, / und uns von kurtze der zceytt wegen / mit den ersten antwurt und ewer gutduncken lassen wyssennn, / damit in koniglichen und diß lands geschefften kein unbekwemheit sich begebe, / wy wir uns dan gentzlich zu Ewer Erbarkeit, dy wir Gote in sein gnad befelhenn, vorsehen. /

Datum Heylsborgk, den XXVI April M D XXXIXten.

Ioannes, von Gots gnaden byschoff zu Ermelandt.