Den ersamen unnd namhafftigen herren burgermeister und rathman der koniglichen stadt Dantzke, unsern gunstigenn freundenn.

Unsern freuntlichen grus und alles guts zuvoran. Ersame, namhafftige herren, gunstige freunde.

Wir haben hie von uns abgefertigt unsere zwene bruder neben unserm schwager, dem edlen, ernvhesten Hansen Glaubitz, in unserm und unser schwester nahmen zubesichtigen und sich zuerkunden, was uns und in die tode hant unsers lieben, seligen vaters und mutter in beweglichen und unbeweglichen gutern hat nach gelassen, dormit zuthun und vorzunehmen gleich, ab wir und unsere schwestern kegenwertig weren, derwegen wir Ewer Erbarkeit freuntlich bitten, wolten in forderlich und behulflich sein, das sie alles das jenige zu solchen grunden und guthern gehorig im stadtbuch, und wo das wer vorschrieben oder vorzeichent, erhalten und doraus sich wie umb alles mochten belernen und [d]es ein volkommenen bericht an uns bringen, in auch von unsernt wegen freuntschafft und gute gunst beweisen, domit sie widderumb an uns zeitlich und wol abgericht mugen gelangenn, wie wir uns dan gentzlich zu Ewer Erbarkeit wollen vorsehen / und solchs in aller freuntlicheit umb derselbte Ewer Erbarkeit, die wir Gote in sein gnad befelhen, wilferig unnd gerne beschulden.

Datum aus unserm schloss Heylsperg, den funften tag Iulii M D XLten.

Ioannes, von Gots gnadenn bischoff zu Ermelanndt.