APG 300, 53, 267, p. 140

Den ersamen und namhafftigen herren burgermeister und ratman der koniglichn stadt Dantzke, unsern besondern, guten freunden.

APG 300, 53, 267, p. 135

Unsern freuntlichen grus und alles guts zuvoran. Ersame, namhafftige hern, besondere, guthe freunde. /

Wir haben nicht mugen nachlassen E(wer) E(rbarkei)t mit diesem unserm schreiben zuersuchen, dieweil der erhafftige Hans Holste, E(wer) E(rbarkei)t mitburger, an uns gekommen und angezeigt, wie er im beschwertem gemut sorcht halben sich von E(wer) E(rbarkei)t begeben und uns den recess, so er in negst gehaltner tagefart zu Graudentz von koniglichen dieser lande hern rethen in der sachen des testaments seins vaters erlangt, vorgelesen, mit welchem solche sache uff zukunftige tagefart vorwiesen, wie dan die copei hyerein geschlossen weiter thut melden. Ist hierumb an E(wer) E(rbarkei)t unser freuntlich bitt, uns wolten beantworten, worinne er E(wer) E(rbarkei)t widdrig und vorletzt ader aus was ursachen er in ungunst E(wer) E(rbarkei)t gefallen, ab wir in widderumb in gunst E(wer) E(rbarkei)t, den wir gern vil guts und liebs zuthun gevlissen, mochten brengen und im gutigkeit bei E(wer) E(rbarkei)t erhalten. Dis haben wir gewonlicher, freuntlicher weis E(wer) E(rbarkei)t, die wir Gott in sein gnad befelhen, zuwissen nicht APG 300, 53, 267, p. 136 mugen bergen. /

Dat(um) aus unserm schlos Heylsberg, den XXIX Decembris M D XLIt(en).

Joannes, von Gots gnaden bischoff zu Ermelandt /

In der letzten zalung der scharffaw ist uns E(wer) E(rbarkei)t ein fas stur, nach laut des contracts mit unserm seligen negsten vorfarn gemacht, vorblieben. So die fischerei in den orten bei E(wer) E(rbarkei)t wol geraten ader nach geraten wurde, / wollet solchs nicht vorgessenn. /