Denn ersamen unnd namhafftigenn herren burgermeisternn und rathmannen der koniglichen stadt Dantzig, / unsern besunder gutten freunden

Unsernn freuntlichen grus unnd alles gutts zuvorann. Ersame, namhaftige herrenn, besundere, gutte freunde. /

Wie wir den negsten monthag Euer Erbarkeit geschriebenn, / das wir von wegen des zeugs der herren botschafter / vonn dem hochwirdigenn, unserm lieben hern brudern, bisschove zu Colmesehe antwurt auf unser schreiben gewertig sein / gewesenn, / so ist unns dasselbte gestrigs thags zukomenn, / darin sein liebe antzeigt / des willens mit denn andern hern collegenn auf den weg in XIIII ungeferlich thagenn / sich zubegebenn. / Weil dann der edele, erenvheste her Iohan von Werdenn, burggraf unnd Euer Erbarkeit mittels burgermeister, / heuptman zu Neuenburg, / etwan mit schwacheit ( wie wir mitleidlich vorstandenn ) befallenn / unnd villeicht diese reise zu diesser legacion, / vonn den ersamen der stedte vorordent, / nicht fueglich wirt mugen annhemen, / hab wir bey uns bedacht, / damit dieser zcog ane weiter hindernus werde gefurdert, / das Euer Erbarkeit mit wissenn und willenn der ersamenn vonn Thorn und Elbing, / denen dis unser bedenckenn mag zugestellet werden, / einen anderen in hern Iohansen stelle / woletenn, / als nemlich den erbarn, namhaftigenn hern Georgenn Giese, / Euer Erbarkeit mittels rathmann, / den wir fast tüchtig darzu achtenn, / auch ane das / mit seinem hern bruder den weg ziehenn wirt, / das ihm aus solcher wehlung halbenn / under der stedte siegell bekentnis wurden mitgegebenn, / welchs wir Euer Erbarkeit, / den andern ersamen der stedte mit zuteilenn, / zu notturft der hernn bottschafter abrichung / gunstiger weis nicht habenn wollenn vorhaltenn. / Gotlichenn gnadenn bevolhenn. /

Datum aus unserm schloss Heilsberg, denn XXVten Augusti M D XLVI.

Ioannes, von Gottes gnadenn bisschoff zw Ermelanndt