Reverendissimo in Christo patri et domino, domino Ioanni Dei gratia episcopo Culmensi, administratorique episcopatus Pomezaniensis et postulato Varmiensi, [domin]o meo clementissimo

Post humillimam obsequiorum meorum in gratiam Paternitatis Vestrae Reverendissimae commendationem. Reverendissime in Christo pater et domine, domine clementissime.

Cum magister Iacobus, expertissimus ille Gallici morbi medicus, quem principaliter cum litteris Paternitatis Vestrae Reverendissimae conveneram, usque adeo infirmitatem meam flocci penderet, ut indignum diceret, qui eam ob rem me huc contulissem, quin immo non esse necessarium, ut hic vel unam diem eiusce rei gratia perseverarem, adhibui, de consilio domini doctoris Ioannis Tresler, qui syrupis, pillulis, emplastris, birretis et id genus aliis aversionibus flegmatum me iuvare hucusque non desistit, alium chirurgicum, in cuius hactenus cura sum, promittentem mihi, modo X floreni Hungaricales adnumerentur, integram sanitatem. Quamprimum itaque ex divinae maiestatis clementia solidiorem sanitatem consecutus fuero, chirurgico ope bonorum amicorum contentato me Lubaviam ad Paternitatem Vestram Reverendissimam, dominum meum clementissimum, conferam. Diu enim hic propter omnium rerum nimiam caritatem perseverare non potero etc.

Novarum hic rerum ego, qui nusquam exeo, nihil aliud scire potui praeter id, quod temerarius ille et nimium perfrictae frontis monachus Pangracius contionator, qui Lutheranismo totam hanc urbem inficere seditiosamque reddere non cessat, proximo die Dominico ...naturae seu litterarum ... per Fuggaros a Sede [Apostolica] [praese]ntarum habitum religionis suae penitus depone[t]. Quamvis dominus officialis ei hoc ipsum facere propter falsam in supplicatione contentam narrationem non admiserit, firmissime statuit. Quo deposito et quemadmodum passim omnes futurum arbitrantur, superducta uxore factiosae suae saevitionis errorem hic faciet longe peiorem priore.

Quod reliquum est, me obsequiaque mea Paternitati Vestrae Reverendissimae, domino meo clem[en]tissimo humillime commendo pro sanitate omniumque rerum successu felicissimo Paternitati Vestrae Reverendissimae dominum Deum oraturus sedulo.

Datum Gedani, XVII Octobris anno Domini M-o DXXXVII.

Eiusdem Paternitatis Vestrae Reverendissimae infimus servitor Baltasar a Lublin