Reverendissimo in Christo Patri et Domino, domino Ioanni Dei gratia episcopo Culmensi, domino meo colendissimo

Reverendissime in Christo Pater et Domine, domine colendissime et perpetuo observande.

Servitiorum meorum sedulam commendationem etc.

Acceptis heri litteris Reverendissimae Dominationis Vestrae per hunc eius servitorem perspexi negotia nostra Deo bene favente ad catastrophen pervenisse. Quare de his scribens ex battologo Laconicus deinceps ero. Ago vero gratias immensas Reverendissimae Dominationi Vestrae, adeo se apud me aperienti, ut prorsus nihil premat eorum, quae de his rebus accepit, quae omnia nunc remitto. Sunt in his, quae hominem suspicacem torquere etiamnum possent, ut quod in litterarum regiarum contextum posita non sunt, quae scheda indita continentur, et quod magnificus dominus vicecancellarius nihil respondet ad ea, quae pro me Reverendissima Dominatio Vestra scripsit. Sed his ego non angor, securus exspectans rei eventum et Dei benedictionem.

Dominum Nypschitz gratissimum accipiam hospitem in aedes meas nec est, quod hoc meum officium impedire possit, si cum illo non concurrerit illustrissimus dominus Prussiae dux, quem solitum hospitium petentem credo, nec ipsum dominum Nipschitz velle a me excludi. Hoc solum, ut metuam, facit fama adventus eius ex Dania, quamquam sunt, qui opinentur eum hac iter non facturum, sed alio profecturum ob suspectam auram in Monteregio, de quo si quid certi habet Reverendissima Dominatio Vestra, rogo interim me faciat certiorem.

Nolim tamen dominum Nipschitz propter hanc ambiguitatem declinare aedes meas, nam si apud me diversari non poterit, efficiam, ut recipiatur a domino Felice non incommodius quam a me, quam rem ita Dominatio Vestra Reverendissima dirigere velit, modo ille contentus esse possit tenuitate nostra et cervisia nigra. Curabo tamen, ut habeatur, quam fieri potest commodissime.

Is ut quarta feria proxima huc adveniat, necesse est, id est pridie, quam celebranda est electio, cui dies Iovis est constitutus. Alioqui oportebit illum prorogare in sequentem vel perendinam diem. De qua re opus est, ut me Dominatio Vestra Reverendissima in tempore admoneat, saltem ut sciam, quo die dominus Nipschitz huc adventurus sit. Cum enim ad actum electionis, ut puto, legationem habeat, non conveniet, ut antevertamus eum, nam alioqui sufficeret, ut cubicularius regius cum litteris suis veniret, quem fortasse non inconsultum esset permitti, ut videlicet tertia feria adesset, ne sit, quod in electione comperendinationi occasionem dare possit.

Consulo autem fideliter, ne orator regius in legationem, quam in capitulo expositurus est, eiusmodi aliquid narret, quod extorquere videatur capitularem consensum in Dominationem Vestram Reverendissimam. Nam si nominationibus addentur preces principis pro uno aut comminationum quippiam, habebit res coactionis speciem, quae a libertate ea, quam pacta concedunt, videbitur deturbare capitulum, quod odiosissimum est omnibus. Licet autem ei cum decoro suadere, ut fugiant schismata sintque concordes in praeficiendo uno ex nominatis, potestque et hoc addi sanctam regiam maiestatem non dubitare capitulum servaturum constantiam et affectum pristinum erga reverendissimum dominum Culmensem etc.

Crastino die huc venient administratores nostri ex Heilsberg et Allenstein exspectaturque et dominus praepositus, ut frequente capitulo consultatio habeatur de preambulis electionis et ut res recte instituatur, nec deerit mentio de articulis et iurameto, qua in re utar pro Dominatione Vestrae Reverendissima officio meo. Mitto formulam mandati a Reverendissima Dominatione Vestra huc mittendi, quo non utendum erit existimo, si in suffragiis omnes erimus concordes in Reverendissimam Dominationem Vestram, de quo nihil dubito. Sin vero etiam sic honorare aliquem vellet Dominatio Vestra Reverendissima suffragio suo, dignetur eum mihi nominare, ne quem videar ceteris meo Marte pertulisse et contingat mihi quod olim Paridi.

Peracta electione quando ad Reverendissimam Dominationem Vestram venturus sim, adhuc est incertum, nam in diem XXIIII Septembris reiectae sunt causae aliquae capitulares graves admodum, quarum tractatibus me abesse domini non sinent adeoque ante tertiam feriam, videlicet XXV Septembris, vix potero hinc sol.... Si, ut conscio, dominus Nypschitz oratorem regium aget in proximo conventu, licebit ei conveniendi tempus suspendere in tertium vel quartum diem ac simul excusare Reverendissimam Dominationem Vestram praetextu aliorum negotiorum regiorum etc.

Cum domino Snellenberg agam hodie vel cras, in ceteris quoque parebo iussis Reverendissimae Dominationis Vestrae.

Dominus Alexander videtur affectare congressum cum Reverendisima Dominatione Vestra, ut mecum deputatur. Quod consultum ne sit, expendat Reverendissima Dominatio Vestra et in sententiam suam rescribat. Propter negotia Romana fortasse expediet uti consilio eius, etiam si ipse non proficiscatur.

Commendo me unice gratiae et favori Reverendissimae Dominationis Vestrae. Quam Deus valetudine et honoribus prosperet, precor.

Frauenburg, die XV Septembris 1537.

Eiusdem Reverendissimae Dominationi Vestrae addictissimus Tidemannus Gise custos