Reverendissimo in Christo patri et domino, domino Ioanni electo episcopo Culmensi et apud sacram caesaream maiestatem oratori etc., fautori et amico gratioso ac modis omnibus honorandissimo

Reverendissime in Christo pater et domine, domine fautor gratiose ac modis omnibus honorande. Servitiorum meorum commendatione praemissa. Salutem ac multae felicitatis assidua incrementa Vestrae Reverendissimae Paternitati precor et faveo.

Vix ausim, Reverendissime Praesul, tantum mihi arrogare auctoritatis, ut quippiam mihi ipsi aut amicis obtinere ac impetrare a Reverendissima Paternitate Vestra certo promitterem, utpote homo ignotus et de Reverendissima Paternitate Vestra nihil prorsus meritus, nisi mansuetissimus candor et singularis humanitas Vestrae Reverendissimae Paternitatis me eo pellexisset, qua fretus negotium meorum commendare Vestrae Reverendissimae Paternitati minime dubitavi. Proinde magnopere rogo amicabiliterque precibus contendo, ut Vestra Reverendissima Paternitas negotium Alexandri Iudaei, subditi mei, sic commendatum esse velit, qui istac Venetias transire solet cum sua exigua suppellectile mercatoria, quod ipsi ordinare et obtinere litteras liberi ac tuti transitus per dominia caesareae maiestatis vestra Reverendissima Paternitas dignaretur, ut ipsi istac eunti Venetias liber pateat ingressus et exitus, quod ipse tanto devinctus beneficio Vestrae Reverendissimae Paternitatis semper mereri vult et debet. Ego etiam pro tam humana in me voluntate omnibus modis inservire ac morem gerere Vestrae Reverendissimae Paternitati assidue studebo, paratus ad oblatam occasionem aequam officiorum rependere lancem. Tandem ut optime ac diutissime valeat Vestra Reverendissima Paternitas, opto atque cupio, cui famulicia mea officiose commendo.

Datum Cracoviae, II mensis Iunii, anno Domini 1530.

Andreas comes de Thanczin palatinus Cracoviensis