BCz, 1606, p. 502

Dem erwirdigenn yn Gott unnserm besonndernn liebenn freundt unnd nachparnn herrnn Johannsen bischoffen zu Ermelanndt./

BCz, 1606, p. 501

Unnser freuntlich dinst zuvor. /

Erwidiger ÿn Gott besonnder lieber freundt unnd nachpar. /

Wes ahnn unns unnser underthann unnd burger Peter Stubes der stadt Kneiphoff Konigspergk, / supplicirenn thut / habenn E(uer) L(ieb) aus eingeschlossener seÿner supplication zuersehenn. / Dieweil er unns dann inenn darauff ahnn E(uer) L(ieb) domit er umb sovil desteher zu dem seynenn khommen möcht zuverschreÿbenn demuttigs vleiss angelangtt unnd gebethenn, / habenn wir ime dieselbe yhn anmerckung das wir ihe gernn unsere arme underthanenn ÿhnn irenn billichen und rechtfertigenn sachenn gefurdertt sehenn und wissenn woltenn / mit gnaden nit wegernn wollenn. /

Ist derwegenn ahnn E(uer) L(ieb) unser freuntlich und nachparlich bith, / dieselb wollen irem heuptmann zu Resell, / oder wie es derselbenn am bestenn gelegenn / mit gnaden bevelenn lassen, / das ehr die ihenigenn so gedachtem unserm underthann, / noch etzlich hinderstellig erb / und furgestrackt gelt lauts seÿner supplicationn schuldig, / dohin haltenn unnd weÿsenn wolle, / das er das seyne one weÿternn nachteyligenn vertzug oder beschwer, / nachdem er ein alter schwacher man / der nit weitt reÿsen khan / unnd neun lebendiger kinder hatt / bekhommen möge / unnd inenn dieser unnser furschrifft geniesslich unnd ersprisslich entpfindenn lassenn. / Das seindt wir umb E(uer) L(ieb) unnd die ewern gleichs fals zuthun geneigt.

Dat(um) Konigspergk, denn XXVII tagk Augusti anno etc. XXXX-t(en).

Vonn Gotts gnadenn Albrecht marggraff zu Brandenburgk, yhn Preussenn, zu Stettin, Pomern, / der Cassubenn unnd Wenndenn hertzogk, burggraff zu Nurmburgk und furst zu Rügen/