BCz, 1606, p. 584

Dem erwirdigenn inn Gott, unnserm besondernn liebenn freundt unnd nachparnn, herrn Johannsenn bischoffenn zu Ermelandt /

BCz, 1606, p. 583

Unnser freuntlich dinst zuvor. /

Erwirdiger inn Gott besonder lieber freundt unnd nachpar.

Unns hatt der edell unnser lieber getreuer Georg herr vonn Kitlicz zuvornhemenn gegeben, / wie er eins zeigers inn seinenn obligendenn gerigenn hendlenn, / mit dem ersamenn auch unnsernn liebenn getreuen dem rath unnd gemeinheitenn der stadt Preuscheÿlaw schwebent benotturft / unnd darauff einenn pfarrer aus E(uer) L(ieb) gebiethenn (denenn ehr namhafftig anczuczeigenn) beÿ derselbenn E(uer) L(ieb) hoffgericht rechtlicher weÿse vorhorenn zulassenn gewilligt. / Demnach unns inn untherdenigkeit angelanngt unnd gebethenn, / inenn genn E(uer) L(ieb) damit derselb vorhort mit gnadenn zuvorschreibenn, welchs wir ime der pilligkeitt nach nit habenn abschlaenn mogen. Unnd derhalbenn so gelanngt an E(uer) L(ieb) unnser freuntlich bitt dieselb woltenn berurtenn Georgenn vonn Kytlicz inn denn mit gnadenn wilferig erscheinenn, / denn zeugenn verhornn lassenn / unnd wes ehr alsdann schriftlichen bittenn unnd begerenn wurd ahnn unnser hoffgericht ferner zutragenn, / ime zur pilligkeit umb unnser furbitt nit abschlaenn. / Ann dem allenn thut unns E(uer) L(ieb) freuntlichen gefallenn. / Wollens auch widerumb in gleichenn unnd mererenn umb E(uer) L(ieb) freuntlichenn unnd nachparlichenn beschuldenn.

Dat(um) Konigspergk, denn 2. Iunii anno 1541 etc.

Vonn Gots gnadenn Albrecht marggraff zw Branndennburgk, inn Preussenn, zw Stettinn, / Pommernn, / der Cassubenn und Wenden herczogk, / burggraff zw Nurnbergk unnd furst zu Rugen