BCz, 403, p. 813

Dem Erwirdigenn in Goth, unnserm besondern lieben freunde unnd nachparn, hern Johanszen bieschove zu Ermelanndt /

BCz, 403, p. 812

Unnser freundlich diennst zuvornn.

Erwirdiger in Goth, besonnder lieber freundt und nachpar. /

Seinthemal E(uer) L(ieb) sich uf unnser gethanes jungstes schreibenn bey irem wirdigenn capitel zur Guttstadt wegenn des heuptprivilegii unnd eczlicher clenodienn, / welchs beides magister Iacobus Deutzschmann seliger ettwann thumdechant zu Khonigsperg vonn der kirchenn daselbs abhenndig unnd weck gebracht, vleissig wollenn erkundigenn unnd nodturfftige nachforschung darauf wennden lassenn. / Und demnach darinnenn sich der gebure uf fernner annsuchenn zuvorhaltenn erbottenn. /

Wie dan E(uer) L(ieb) schriefftenn bedatumbdt Heilsbergk, denn XI Septembris verlauffenem funfunndvirtzigstenn jahres fernner mitbrigen. Alss thun wir unnss gegenn E(uer) L(ieb) solches wolmeÿnennden erbithenns halbenn höchlichen bedanngken und zweiffelnn nicht E(uer) L(ieb) habenn solche(n) irem freundlichenn erbietten treulichen nachgeseczt unnd wie ist or ess⌈istist or ess⌉ umb denn bemelthenn hanndell gelegenn erfarenn. /

Hirumb unnser nachberlichs bittenn E(uer) L(ieb) wollenn unns durch ir schreibenn wes sie sich disfals erkundigt, / damit wir unnss weithers darnach zurichten guttlichenn eröffenenn, / dann wir gewislichenn eigenntlichen grundt, dass bemelther magister Deutzschman die privilegia unnd clenodia nach der Guttstadt bracht, auch das capittel zu seinenn handen genohmen. /

Derhalbenn wollenn wir solche einmahl bey E(uer) L(ieb) capitel zur Guttstadt unnd unnser thumkirchen zw Konigsperck enntfrembdett wissenn, / ader die wege suchenn darumb unns E(uer) L(ieb) nicht zuvordennck(en), damit wir des benannthenn habhaftig mogenn, / versehenlich E(uer) L(ieb) bey irem capittel verschaffen werden, / uff das sie sich hirinnenn nachbarlicher unverweislicher gebur erzeigenn. Das sein wir umb E(uer) L(ieb) freundlichenn zuvordienenn gewogen.

Dat(um) Konigsperg, den II Ianuarii anno im 46-t(en).

Vonn Gots gnadenn Albecht marggrave zu Brandemburgk, inn Preussenn, zu Stettin, Pommern, der Cassub(en) und Wennde(n) herzog, burggrave zu Nuremberg und furst zu Rugenn, etc. manu propria subscripsit