Dem hoegwirdigesten in Gott Fursten und Herren, / herren Ioanni bisschofe czu Ermlandt, unszrem genedigestem herren.

Hoegwyrdigester in Got Furst, / Genedigester Herre.

Unnszre gantcz demutige willige und stete dinste / seint Ewer Hogwirdigesten Gnaden nu und in alle czait bevoran mit allem fleysze entpholen.

Genedigester Herre. /

Wy{e}r seint der gewissen zcuvorsycht, / es haben Ewer Hogwirdigesten Gnaden durch unnszren burger Greger Schonwaldt / die aufferlegten funfftczig floren entphangen / und dweyle denne czur selbigen czaidt unszere vilgelipten rate frunde. / Szo im negsten landtgespreech gewesen / nicht vorhanden / ist drynnen wurden vorseen, / das die czeen floren, szo der groszmechtige herre Georg von Canapat pomerellischer woywode etc., die bey die unszren / seint jens mol abegelegtt / neben deme unszren nicht szeyn Eurer Hogwirdigesten Gnaden czugestaltt. /

Nochmols aber als wir des von inen erjamert do mite keynn weyter vorczug drem fylle haben wir mit jegenwurtigem unszren dyner Anthonio dieselbigen / 10 / floren czun handen gefertiget / Ewer Hogwirdigesten Gnaden gantcz demutig bittende / sollichem vorseen uns nicht beymessen / b <e> szunder in gnaden uns bestethuen wenden. /

Das wollen wir ummbe Ewer Hogwirdigesten Gnaden die Got lange selig und g <e> sunt enthalte ungesparetes fleises willig vordinen.

Gegeben bynnen Thornn, am 13 tage / der mondes Aprilis noch der gepurdt Jesu unsers aynigen hailandes tausent V-c XLI jare.

Ewer Hogwirdigesten Gnaden demutige und dinstwillige burgermaystere und radtmane der Koniglichen Stadt Thornn