Dem durchleuchten, hochgebornen fursten unnd herren, herren Albrechten, von Gottes gnaden margraffen zw Brandenburg, in Preussn, zw Stettin, Pomern, der Cassuben und Wenden hertzog, burgraff zw Nurmberg unnd furst zw Rugen, unserm hochgunstigen, lieben herren unnd freundt /

Durchlauchterr , hochgebornerr furst, hochgunstigerr , lyber herr und freundt. / Unser freuntliche, wyllige dinst zuvoran. /

Nechten spath yst uns Euer Furstlichen Durchlaucht schreyben zu komen, / doraus alles wol eingenhomen, was dy konigliche besigelte instruction durch koniglichen botschaffterr Euer Furstlichen Durchlaucht uberantwurt / den marienwerdyschenn handel belangend / in sich helt, / der wegen wirr uns auch myt dem hern schatzmeysterr dyse stunde noch notterfft beredt, / in darein geleytet ( wy im auch durch konniglich schriftlich befhel ufferlegt, / das er vor dass erst mit konniglichem botschaffterr zu samne kommen und sich mit ihm alles entslisse ), das err morgen und den donnerstag darnach uff mitlem wege zur Eyle des koniglichen botschaffters wyl warthenn, / und seynnem befhelich nachkomenn, / von dem Euer Furstliche Durchlaucht allen bericht der sachenn wirdt vornhemen. / Diss haben wir freuntdinstlicherr, der gunst wir unss mt vleyss befhelenn, / nicht mugen vorhaltenn. /

Datum Heylsberg, den XXIII Septembris M D XXXIXten .

Ioannes, von Gots gnaden byschoff zu Ermelandt / qui supra manu propria