Dem durchlauchten, hochgebornen fursten und herren, hern Albrechten, von Gots gnaden marggraff zu Brandenburg, / in Preussen, zu Stetin, / Pommern, / der Cassuben unnd Wenden hertzog, / burggraff zu Normberg und furst zu Rugen, / unserm hochgunstigen, lieben herren und freunde /

Durchlauchter, hochgeborner furst, hochgunstiger, lieber her und freundt. / Unsere freuntliche unnd vleiswillige dienste zuvoran. /

Wie wir in abrichtung des boten uff Ewer Furstlichen Durchlaucht schreiben, des datum diesen tag helt, / gewesen, / ist hieher gelangt der edel, ernfest her dantzker castellan, / den wir haben lassen wissen, / ab er Ewer Furstlichen Durchlaucht wolde schreiben, / das er mit einsetzte, / was im von der tagfart in der Cron wissentlich, / wie Ewer Furstliche Durchlaucht von im wirt vornehmen. / Uns ist von dem hochwirdigen hern Luca, bischoff in der Coye, anders nicht zukommen, / dan das sein lieb dohin uff solch gesprech sich zubegeben / het vorgenommen, / und uns auch doselbst gerne wolte sehen und ansprechen, / dobei keine zeitt ausgedruckt. / Erfare wir weiter etwas, / wolle wir Ewer Furstlichen Durchlaucht, der gunst wir uns bevelhen, durch eigenen nicht vorhalten / und uf unser negst schreiben Ewer Furstlichen Durchlaucht freuntlich antwort unbeschwert warten. /

Datum Heilsperg, den letzten tag Februarii M D XLII.

Ioannes, von Gots gnaden bischoff zu Ermelandt