GStA, PK, HBA, C 2, No 66, f. 2v

Dem durchlauchten, hochgebornen fursten und hern, / hern Albrecht(en), marggraff(en) zw Brandenburg etc. und herczog in Prewssenn, / unserm grosgunstigen, lieben hern und freunde /

GStA, PK, HBA, C 2, No 66 f. 1r

Durchlauchter, hochgeborner furst, grosgunstiger, lieber her unnd freundt. / Unsere freuntliche, willige dienst, / und was wir wolgefallens zwthun vormugen, zuvoran. /

Den XVIII Marcii vorgangen / hab wir E(wer) Ir(barkei)t briff eigener handt / und den andren, die dreÿ pawren belangend, / beantwurt. / Vorsehen uns, solch unser schreiben / seÿ E(wer) Ir(barkei)t vorlengst geworden. / So seÿ wir mitler czeit bericht, / wie unser pawern, / ausem lobauschen gebit / im negsten vorgangen krÿge und sider der czeit entwichen, / als nemlich Jacob und Michel Meÿcke aus unserm dorff Rosenthal, / wonende im osterrodischen gebit / im dorffe Leÿpe, / Macz, derselben brwder, / ouch im osterrodischen, / im dorffe Altenhain, / Barthel Scholcz, ouch von Rosenthal, / im eilawischen gebit / zw Newdorff, / Barthel Scholcz von Grabaw / im osterrodischen zw Nappern, / Gros Francze, ouch von Grabaw, / im prewsmarcktischen gebit / wont, nicht weith von Salfeld(en), in E(wer) Ir(barkei)t herschafften vorhalten werden, / der wir nicht gedocht oder gefurdert hetten, / wer wir dergleichen nicht ersucht worden. / Bitten derhalben, E(wer) Ir(barkei)t wold uns vorstendigen, / was hir inne E(wer) Ir(barkei)t wille wirt sein, / dem wir gerne wolle volgen. / Es ist jo ein schwer ding armen leuthen, / die zuvor das ire vorlossen / und sich GStA, PK, HBA, C 2, No 66 f. 1v under einen andren hern geseczt, / sich beweibt, / erb und eigen mit swerer arbeit / zw wegen brocht, / und solchs darnoch alles, / so sie gefurdert werden, / zw vorliren und vorlossen. / Es wirt keiner nicht ausgeben, / dan so wie er geko(m)men und angeno(m)men ist. Wurden, / wie dan solchs E(wer) Ir(barkei)t im besten wol weis, / was der wegen E(wer) Ir(barkei)t wil gethon haben, / wolle wir uns wilfarig halten, / dan E(wer) Ir(barkei)t vil fruntlicher dinst und wolgefallen zwerczegen seÿ wir gancz willig und geflissen. / Hiemit bitten und wunschen wir E(wer) Ir(barkei)t von Gote dem almechtigen in seiner gnaden / und aller gelugseligheit / ein langweriges und gesundes leben / und thun uns in E(wer) Ir(barkei)t lieb unnd gunst freuntlich befelhen. /

Dat(um) uff unserm slosse Lobaw, den XIIII tag Aprilis 1534.

Ioannes, von Gots gnad(en) bischoff zw Culmen(n), administrator des bischtumbs Pomezan