Dem durchlauchten, hochgebornen fursten und hern, hern Albrechten, marggraffen zw Brandenburg etc. und herczogen in Prewssenn, / unserm grosgunstigen, lieben hern und freunde /

Durchlauchter, hochgeborner furst, grosgunstiger, lieber her und freundt. / Unsere freuntliche, willige dienst zuvoran. /

Wie wir negst mit Ewer Irbarkeit hoffmoler geschriben, / schicke wir hiemit unsern secretarien, den edlen Merten Nibschicz, von unsern wegen / in des erbarn Pawl Fasolts sachen zw underhandlen, / bittend solche unsere gutmeÿnung, / do mit disse czwespeldigheit, / das wir jo gernn wolten, / zum ende mocht kommen, / in gunst von uns uffzwnhemen. / Ewr Irbarkeit vil fruntlicher dienst zwthun, / ehre und nucz zw furdren und schaffen sein wir allweg willig. / Hiemit gebe Got der almechtig Ewr Irbarkeit inn gelugkseliger regirung und zwnhemen lange gesuntheit und sein gotliche genad. /

Datum Lobaw, den XX Augusti anno domini 1534.

Ioannes, von Gots gnaden bischoff zw Culmenn, administrator des bischtumbs Pomezan /