R[everendissimo in Christo] patri et domino domino Ioanni Dantischo, [epis]copo Chulmensi, [serenissimarum maiesta]tum Po[loniae oratori etc., domino et fratri honorandissimo]

[Apud sacram caesaream et catholicam maiestatem]

Reverendissime domine. Post plurimam commendationem.

Pridie ad Vestram Dominationem dedi litteras longiores, in praesentia laconismo uti cogor ob nuntii celeritatem, qui Neapolim petit. In capella regali Sancti Nicolai de Baro sunt plures canonicatus, quorum medietatis collatio ad caesarem spectat, alterius ad priorem. Rogaveram Levicium, ut Dominationis Vestrae medio et intercessione obtineret a caesarea maiestate duos canonicatus primo et secundo vacaturos ex his, qui ad caesarem s[pectant. R]escripsit semel tantum et verba pro verbis rettulit, [nec quid] actum sit, compertum habeo. Quamobrem rogo Dominationem Vestram [Reverendissimam, ve]lit pro sua virtute et benevolentia hanc gratiam a caesare exorare et quicquid in hanc causam impendii contulerit, ad assem resarciam. Insuper perpetuo me debiturum profitebor eidem Dominationi Vestrae Reverendissimae, cui me et servitia mea ex corde commendo. Si duo obtineri non poterint, saltem unus obtineatur.

Datae Bari, die ultima Ianuarii 1531.

Eiusdem Vestrae Reverendissimae Dominationis ad mandata paratissimus Ludovicus Aliphius etc.