Reverendissimo in Christo Patri et Domino, domino Ioanni Dei gratia episcopo Culmensi, fratri et amico carissimo ac honorando

Reverendissime in Christo Pater et Domine, domine frater et amice carissime ac honorande.

Scripsit mihi superioribus diebus magnificus dominus palatinus Marienburgensis videri sibi propter certas rationes impendentium periculorum necessario esse indicendum conventum in his terris Prussiae ac paulo post festum sancti Andreae vel Elbingi, vel aliubi conveniendum. Cui quid responderim, ex responsi mei exemplo litteris meis ad Reverendissimam Dominationem Vestram tunc datis imposito intellexit eadem Reverendissima Dominatio Vestra.

Non ita multo post habui ab illustrissimo domino Prussiae duce etc. litteras, cui etiam placuit conventum pro festo Stanislai celebrandum anticipari et ut his communibus terris Prussiae diligenti observatione prospiciatur propter non contemnendas causas, imprimis quod licet inter illustrem dominum Cristianum Holsaciae ducem ac Lubecenses pax pacta sit, attamen utrique dissidentium ac belligerantium parti super Daniae Regno fortunam suam experiendi facultas et potestas reservata sit et quod palatinus Rheni partem Cruciferorum foturus cum Lubecensibus et comite Aldenburgensi necnon Livoniensibus practicam suam habeat in eum eventum, ubi res Regni Daniae feliciter illis caderent, militem illum mercennarium in has terras fortassis transmittendi. Quibus rationibus ego permotus et futuris periculis maturo consilio anteventum iri cupiens, quid domino palatino Marienburgensi nunc scribam, ex copia his imposita Reverendissima Dominatio Vestra cognoscet.

Quam rogo, ut cum domino palatino Culmensi ac aliis dominis consiliariis terrae Culmensis super his omnibus et praesertim super die conventus pro tempore Stanislai alioqui haberi soliti anticipandi intelligentiam mutuam habeat et, quid Reverendissimae Dominationi Vestrae una cum illis visum fuerit utile et oportunum, mihi tempestive rescribat, quo et ego ex communi omnium dominorum consiliariorum, imprimis Reverendissimae Dominationis Vestrae assensu et voluntate, serenissimae regiae maiestati (si non alia via, saltem per proprium nuntium, pro communi rei publicae bono) de institutione ac anticipatione illius conventus scribere queam.

Cum his salvam et incolumem vivere Reverendissimam Dominationem Vestram cupio. Cui, ut hic novus annus et felix accedat, et felicior decurrat, opto ex animo.

Ex Heilsberg, in die sancti Stephani protomartyris anno MDXXXV.

Vestrae Reverendissimae Dominationis bonus frater Mauritius episcopus Varmiensis subscripsit