Venerabilibus Dominis, praelatis, canonicis et capitulo ecclesiae nostrae Varmiensis, fratribus sincere nobis dilectis

[Ioannes Dei gratia] episcopus Varmiensis

Venerabiles Domini, fratres sincere dilecti.

Quemadmodum nuper nobis Fraternitates Vestrae scripserunt rogantes, ut illustrissimum dominum ducem, vicinum nostrum, commonefaceremus de missione suorum ad conspectionem structurae molendini usque ad ripam Fraternitatum Vestrarum protrusae, idipsum tum litteris ad illustrissimum dominum ducem, tum etiam per dominum Ioannem Lomuller ad nos aliis in rebus missum diligenter referri curavimus. In eo quidquid nobis respondebitur, Fraternitates Vestras latere non sinemus neque desituri coeptum prosequi negotium, quantum in rem et usum Fraternitatum Vestrarum a nobis poterit praestari.

Quas bene valere optamus.

Ex arce nostra Heilsperg, XXI Martii MDXLI.