Sigismundus Dei gratia rex Poloniae, magnus dux Lithuaniae, Russiae Prussiaeque etc. dominus et heres

Famatis praeconsulibus et consulibus civitatis nostrae Gedanensis, fidelibus dilectis

Gratiam nostram, famati dilecti.

Quemadmodum vobis alias et datis litteris, et medio nobilis Ioannis Dantisci, secretarii nostri fidelis dilecti, etiam sub poenis nostris mandavimus, ut militibus nostris, qui in mari adversum hostes nostros Moschos militant, quod virtute sua et armis quaesierint, nihil adimeretis, sed potius illos ab omni iniuria et tuerentur, et defendant, ita et in praesentia id ipsum repetimus et mandamus, ut secus facere non praesumatis. Quin immo tales milites nostros tormentis et aliis apparamentis ad bellum navale pertinentibus provideatis, rem nobis facturi gratissimam et virtute vestra dignam, per nosque idonea occasione gratia nostra regia referendam.

Datum in Sluzow, feria quinta festi sancti Martii Evangelistae anno Domini M D XXI-o, regni nostri XV.

Commissio propria maiestatis regiae