Reverendissimo in Christo Patri et Domino, domino Ioanni Dei gratia episcopo Varmiensi, domino et maiori observandissimo

Reverendissime in Christo Pater et Domine, domine et maior observandissime.

Salutem et studiorum meorum commendationem.

Qua sententia nunc sit Georgius de Suchten ad tractatum, qui in causa domini Hosii cum venerabili domino Alexandro Gutstati habitus nobis est, ipse mihi dominus Alexander significavit, affirmans ius ad praebendam domini Pauli praepositi Gutstatensis ratum iam sibi esse ab impetratore illo Romano, missa iam citatione et ceteris ad litem necessariis, quorum, ut fidem mihi faceret, autographum ad me misit litterarum, ut vocant compulsorialium, pro Martino Lupi decretarum. Ita refectus spe pristina in hoc nunc est, ut quieto Hosio, sibi liceat cum gratia Reverendissimae Dominationis Vestrae litem prosequi contra dominum praepositum ac super eo canonicatu de iure experiri. Latius omnia ex ipso domino Alexandro Reverendissima Dominatio Vestra intelliget.

Ego, ut quod sentio dicam, non dubito, si iudicio Romae contendendum sit, dominum praepositum succubiturum esse. Quo periculo vellem illum extricari posse. Nolente vero domino Alexandro cassum dimittere ius suum, nescio quid consulendum domino praeposito sit, Reverendissima Dominatio Vestra collocuta cum domino Alexandro modum fortasse inveniet, quo et dominus Hosius pacifice suam possessionem retineat, et domino praeposito opus non sit liti se dubiae committere et inanem suscipere sumptum. In quo ut communi omnium tranquillitati incumbere Reverendissima Dominatio Vestra velit, eam plurimum rogo, inituram apud singulos gratiam non postremam et suorum commoditatibus melius consulturam, quam si eos litigantes commiserit.

Optime valeat Reverendissima Domianatio Vestra, cuius favori et dilectioni me commendo.

Lubaviae, die XX Octobris 1538.

Eiusdem Reverendissimae Dominationis Vestrae obsequentissimus, Tidemannus episcopus Culmensis