Hochwirdiger in Gott Furst, gnediger her.

Noch erbittungk meiner gancz willigen dinst auch wunsch aller gluckseligen wolfart.

Wil ich Euer Gnaden nicht bergen, das mir der her Kostka ein deutsch brifflein, wie wol wir Poln, zwgeschickt hatt, dorinne er begerth, das ich noch einen tagk zw Heilspergk sein harren wolde. Dieweil mich dan der brieff aldo nicht antroffen vnd mir alhie heute erst zwkommen, mein instruction auch mith bringt, das er sich alher sampt den dienern, die er gestellen, sall vorfugen, vnd ich auch furstliche durchlaucht koniglicher maiestet, meines allergenedigsten hern willen zwvorbringen geneigt spure, ist derwegen an Euer Gnade mein dinstliche bitt, Euer Gnade woln im neben meinem brieff schreiben und vormhanen, das er sich alher sampt den dienern vorfugen wolde.

Wie wol ich besorge, er wirth alhir etliche tage vorczihen mussen, idoch wirth sein czeitliche ankunfft furstlicher durchlaucht ursache geben, das kegen theil deste eher zwerfordernn, domith dem vnkost auch ein mol abgeholffen werde etc.

Noch der gnedigen annhemung, so mir heute von furstlicher durchlaucht widerfaren, hatt furstliche durchlaucht kurczlich mith mir beschlossenn, ich solde Euer Gnaden schreiben vnd bitten, das die selbe irenn boten an konigliche maiestet vor dinstage ader mithwoch nicht abfertigen wolde, den vff der tage einen wirth furstliche durchlaucht auch ich Eur Gnaden an hoff schrifften zwschicken.

Bitt derhalben, Euer Gnade wolden den botten vorczihen. Ich hab an Euer Gnade botschafft furstlicher durchlaucht mith allem fleis angeczeigt, wil auch dasselbe, wan ich zw meiner genedigsten fraun kome vnd mith dem herczogen von Holsthein zurede werde, nicht mith wenigerm fleis thun. Domith hab ich mich Euer Gnaden dinstlich und dieselbe Gotte dem Almechtigenn befholenn.

Datum Konigksbergk, freitage noch des Heiligen Creücz tage 1539.

Eur Furstlichen Gnaden williger diner Nickel Nibschicz.