Freuntlichen grus myt aller wolfart wunschung zuvoran. / Edler, wolgeborner her, gunstiger freundt.

Dysen thag ist mir Ewer Herlichkeit schreiben, / im mytwoch negst gegeben, zu khomen, noch welchs uberlesung ich von von stundan koniglicher majestet, meiner gnedigen frawen, der konigin, / dem hern underkantzler und dem hern Nybschitz hab noch Ewer Herlichkeit beger geschryben, / wy dy copeyen mytbringenn, / es wer mit dem boten zu schickn nicht zu sewmenn etc. Wy ich auch negst hab an dy hern wogewoden und castelan und andren briven gegeben / mit koniglicher majestet antwurt abschryfft, / hab ich koniglicher majestet, / auch dem hern underkantzler, wy es umb unser thagfart ein gestaldt habe, / und wy dy nachgeblyben, geschryben / byttende, / dy weyl nicht notige sachenn vorhanden, und dy erschrecklichen zeytung sich gelindert, / das konigliche maistet / dy vorgangne thagfarth uff dy zukunfftige Sancti Michaelis woldt vorlegenn. / So solchs Ewer Herlichkeit gut bedunckt, / woldt etliche hern woyewoden, / und dy am negsten anreden, / dass sy der gleichen / mit entschuldung, worumb dy vorige nicht gehalthen, / koniglicher majestet schreyben, / damit unser misgonner nicht ursach haben, in weyter ungunst uns zu bringen, darein Ewer Herlichkeit wol wirdt wyssen zu treffen, / auch ewermm bothen befelhen, / das er uff unser brive antwurt furder und brengt. / Hymit gebe Got Ewer Herlichkeit in aller gluckselicheyt langwerige gesuntheytt.

Datumm eylentz Heylsberg, XXX May MDXXXIX.