Reverendissimo in Christo Patri et Domino, domino Ioanni Dei gratia episcopo Varmiensi, fratri et maiori plurimum observando

Reverendissime in Christo Pater et Domine, frater et maior observande. Salutem et studiorum meorum commendationem.

Etsi non habeo, quod praecipue nunc scribam, tamen cum hic subditus meus mihi significaret se istuc profecturum, nolui omittere saltem hoc, de quo scio Reverendissimam Dominationem Vestram solicitam esse, scribere, quomodo habeat valetudo mea, de qua nescio, quid dicam aut promittere possim. Convalueram optime et integram videbar adeptus sanitatem. Sed timeo heri me recidivam incidisse, quae rursus me in cubiculo tenet reclusum. Dominus Deus misereatur mei, cuius nomen sit benedictum. Cum habuerit Reverendissima Dominatio Vestra responsum a regia maiestate, rogo id mihi communicet. Miror per camerarium nuper non esse missa mandata, ut de accisa rationes fiant coram dominis consiliariis etc. Forte oblivio id effecit aut nonnullorum dissuasio. Novi apud me est nihil. De obitu reverendissimi domini episcopi Posnaniensis certo ferebatur, an verum sit, non potest Reverendissima Dominatio Vestra nescire. Cupio Reverendissimam Dominationem Vestram diuturnum valere, meque ab illa amari.

Datae Lubaviae, die XXI Maii 1539.

Eiusdem Reverendissimae Dominationis Vestrae studiosissimus Tidemannus episcopus Culmensis