Dem durchlauchten, hochgebornen fursten und herren, hern Albrechten, von Gots gnaden marggraff zu Brandenburg, / in Preussen, / zu Stetin, / Pomern, der Cassuben und Wenden hertzogk, burggraff zu Normberg und furst zu Rugenn, unserm hochgunstigen, lieben herren unnd freunde /

Durchlauchter, hochgeborner furst, hochgunstiger, lieber her und freundt. / Unsere freuntliche und vleiswillige dinste zuvoran. /

Wir haben gestrigs tags Ewer Furstlichen Durchlaucht schreyben, / doneben auch die brieffe von koniglichem hoffe an uns, entpfangen, / dovor wir, / auch vor die mettgeteilte zeÿtung, Ewer Furstlichen Durchlaucht mit hochem vleiss thun dancken, / wollen auch solchs in einem vil grossern umb Ewer Furstliche Durchlaucht gerne freuntlich vor dienen. / Uns ist auch fast die meynung, wie es in Hungern zu gehet, geschrieben, / und sonst nichts besonders. / So uns mitler zeit von zeitungen was wirt zu kommen, / die sollen Ewer Furstliche Durchlaucht von uns unvorhalten bleiben, / der gunst wir uns befelhen, / Got bittende, wolde Ewer Furstliche Durchlaucht zu langen zeiten mit all den iren in langweriger gesuntheit und aller glugseligheit erhalten. /

Datum Heilsperg, den XIII Septembris M D XL.

Joannes, von Gots gnaden bischof zu Ermelandt /

Joannes qui supra manu propria subscripsit