Gedanensibus

Wir haben Ewer Wirde brieff, gegeben zu Dantzig den 25 tag Iunii, alhie zusamen seinde / erhalten / unnd horen lesen. / Loben derhalben Ewer Wirde sorgfeldige unnd noch gelegenheit der tzeit zuvorsicht / uns unnd unserm vaterlande aller zu gut unnd zum besten. Nhu ist es Ewer Wirde nicht verborgen, das derengleichen zeitungen lengst sich gemunckelt, / auch dieselb, / wie itzt auf der banen lewft, / oder jo dergleichen / koniglicher maiestet, unserm allergnedigsten hern, von unsern ettlichen und auch furstlicher durchlaucht hertzogen zu Preussen etc. mit irer botschaft zugeschrieben und kunt gethan, woruff konigliche maiestet ires gemuts meihnung Ewer Wirde schrieftlichen zugefertiget, / welcher brief dem groszmechtiger hern Marienburgschen woywoden ist zugesant. Vorsehen uns gentzlichen, / Ewer Wirde denselbten also von seiner groszmechtigkeit entpfangen habe. / Nhu sehen wir itzt nichts anders zuthun, / rathen oder tathen, / dan konigliche majestet Ewer Wirde geraten hot und zugeschrieben. / Es were dan, das es geschege aus gemeiner vorsamlung disser lande, rethe und stende, / welchs doch vor Michaelis nicht, sonder im sonderlichen tage / derhalben angesatzt, / gescheen kan. / Wie sich auch die stende / von wegen der hulffe, / erweltem konige von Dennemarcken gescheen, / sich am nechsten tag Stanislai gehalten haben also, / das zusolcher hulffe / von ettlichen nichts oder wenig gethan, / ist Ewer Wirde wol wissentlich. / Geschlieslich nochdem das dis thun noch am zweifel hanget, / ab mon das volk, / wie geschrieben mit profande etc. stattlichen wirt komen ausfertigen, / so Ewer Wirde, die den handen am nehsten gelegen, / anders erfaren wurden, / das sie alsdan noch irem vormogen theten, / als tapfer Ewer Wirde vorfarn gethan haben, / wie auch konigliche majestet selbst Ewer Wirde thut underrichten. Anders sehen wir / mit beqwemikeit nichts furzunemen auf diszmoel, / allein das Ewer Wirde koniglicher maiestet dasselbte, / so Ewer Wirde zugeschrieben, auch kunth thete. Thun hiemit Ewer Wirde dem almechtigen gesunt empfelen und vor solchem uberfallen uns alle zubehutten.

Datum Heilsberg, den ersten Iulii 1536.